Ադրբեջանի նախագահ Իլհամ Ալիևը հայտարարել է, որ եթե միջոցներ հատկացվեն Հայաստանին զինելու համար, Բաքուն դա կընկալի որպես ոչ բարեկամական քայլ։ «Ղարաբաղյան երկրորդ պատերազմի ժամանակ մենք ոչնչացրել ենք 4-5 միլիարդ դոլարի հայկական տեխնիկա։ Հարց է՝ որտեղի՞ց է Հայաստանը ստանում այդպիսի գումար, որտեղի՞ց են այդ վարկերը, մարվե՞լ են, թե՞ ոչ։ Եթե այդ վարկերը չլինեին, միանգամայն վստահ եմ, որ ղարաբաղյան երկրորդ պատերազմի կարիքը չէր լինի»,- երեքշաբթի ասել է Ալիևը։ Ալիևի խոսքով՝ եթե Հայաստանին այդքան զգալի միջոցներ չհատկացնեին սպառազինության համար, ապա Երևանը, «գլուխ խոնարհած», կգնար բանակցելու Բաքվի հետ: «Հետևաբար, եթե գումար հատկացվի Հայաստանին զինելու համար, մենք դա կընկալենք որպես ոչ բարեկամական քայլ և համապատասխան կերպով կարձագանքենք»,- ընդգծել է Ալիևը։
Ալիևը նշել է, որ այժմ գլխավոր խնդիրը Ադրբեջանի և Հայաստանի միջև հարաբերությունների կարգավորումն է։ «Բոլոր կազմակերպությունները, որոնք պատրաստ են իրենց ներդրումն ունենալ այս գործընթացում, ընդունելի են: Հայաստանը դրական է արձագանքել հարաբերությունների կարգավորման մեր 5 հիմնական սկզբունքներին: Ես ուզում էի պարզաբանել այս կետը Բրյուսելում և ստացա անհրաժեշտ պատասխանը։ Եթե Հայաստանն ընդունում է այս 5 սկզբունքները, դա նշանակում է, որ նա հրաժարվում է Ադրբեջանի նկատմամբ տարածքային պահանջներից»,- ընդգծել է նա։