Կատարում շարունակվում է ֆուտբոլի աշխարհի առաջնությունը։ Քառորդ եզրափակիչ փուլում այսօր ուժերը չափեցին Խորվաթիայի և Բրազիլիայի հավաքականները։
Հանդիպման հիմնական ժամանակում հավաքականները չկարողացան գրավել միմյանց դարպասները, և խաղը տեղափոխվեց լրացուցիչ ժամանակ։
Լրացուցիչ ժամանակի առաջին կեսի մրցավարի ավելացրած առաջին րոպեին բրազիլացիները կարողացան ի վերջո բացել հաշիվը։ Գոլն իր ակտիվում գրանցեց Նեյմարը։
Լրացուցիչ երկրորդ խաղակեսում, երբ թվում էր, թե Բրազիլիայի հավաքականը մոտ է կիսաեզրափակչին, խորվաթները 116-րդ րոպեին կարողացան խփել պատասխան գոլը։ Աչքի ընկավ փոխարինման մտած Բրունո Պետկովիչը։
Լրացուցիչ ժամանակն այս հաշվով էլ ավարտվեց, և դիմակայության հաղթողն արդեն պետք է որոշվեր 11 մետրանոց հարվածաշարի միջոցով։
Այստեղ փայլուն հանդես եկան խորվաթները, հաղթեցին 4։2 հաշվով և դուրս եկան կիսաեզրափակիչ, որտեղ մրցակիցը կլինի Նիդերլանդներ-Արգենտինա զույգի հաղթողը։
