ԵՄ խորհուրդը հանձնարարել է գնահատել Ուկրաինայի, Վրաստանի և Մոլդովայի՝ ԵՄ անդամակցության հայտերը
Միջազգային
11 Մարտի 2022, 12:52
ԵՄ խորհուրդը հանձնարարել է Եվրահանձնաժողովին՝ գնահատական ներկայացնել Ուկրաինայի, Վրաստանի և Մոլդովայի՝ Եվրոպական համագործակցությանն անդամակցելու դիմումների վերաբերյալ։ Այս մասին ասված է Եվրամիության երկրների և կառավարությունների ղեկավարների՝ ուրբաթ հրապարակված հայտարարության մեջ, որն ընդունվել է Վերսալում ԵՄ ոչ պաշտոնական գագաթնաժողովի առաջին օրվա ավարտին։
«2022թ․ փետրվարի 28-ին, օգտվելով Ուկրաինայի՝ սեփական ճակատագրի ընտրության իրավունքից, նախագահ Վլադիմիր Զելենսկին ներկայացրեց Եվրամիությանն անդամակցելու՝ Ուկրաինայի դիմումը: ԵՄ խորհուրդը արագորեն գործեց և Հանձնաժողովին հրավիրեց՝ իր կարծիքը ներկայացնել այս դիմումի վերաբերյալ՝ պայմանագրերի դրույթներին համապատասխանությունը ստուգելու համար», - ասված է ԵՄ խորհրդի հաղորդագրության մեջ։ Դրանում նշվում է, որ ԵՄ-ն կշարունակի ամրապնդել «եվրոպական ընտանիքին պատկանող» Ուկրաինայի հետ կապերը։
«Խորհուրդը հանձնաժողովին առաջարկել է իր եզրակացությունները ներկայացնել Մոլդովայի և Վրաստանի դիմումների վերաբերյալ», - ասվում է փաստաթղթում։
Հետևեք մեզ Telegram-ում
