Նյու Յորքում տեղի է ունեցել ՄԱԿ-ի Անվտանգության խորհրդի արտակարգ նիստ՝ նվիրված Ուկրաինայի իրավիճակին։ Ռուսաստանի մշտական ներկայացուցիչ Վասիլի Նեբեզնյան հերքել է արևմտյան երկրների ագրեսիայի մեղադրանքները։ «Մենք ագրեսիա ենք իրականացնում ոչ թե ուկրաինացի ժողովրդի, այլ Կիևում իշխանությունը զավթած խունտայի դեմ», - հայտարարել է Նեբեզնյան։
Ռուսաստանի նախագահ Վլադիմիր Պուտինն ավելի վաղ հայտարարել էր, որ որոշում է կայացրել Դոնբասում հատուկ ռազմական գործողություն իրականացնել։ Հեռուստաուղերձում նա ասել է, որ «Դոնբասի հանրապետությունները օգնության խնդրանքով դիմել են Ռուսաստանին, ու հանգամանքները պահանջում են՝ անել վճռական և անհապաղ գործողություններ»։
Իր հերթին, Գերմանիայի մշտական ներկայացուցիչ Անտյե Լենդերցեն կոչ է արել Մոսկվային՝ անհապաղ դադարեցնել ռազմական գործողությունը և դուրս բերել զորքերը։ ՄԱԿ-ի գլխավոր քարտուղար Անտոնիո Գուտերեշը հանդիպումից հետո հայտարարել է, որ այս հակամարտությանը պետք է վերջ դրվի հիմա։ Եվրահանձնաժողովի ղեկավար Ուրսուլա ֆոն դեր Լեյենը հայտարարել է, որ դատապարտում է Ռուսաստանի ռազմական գործողությունը Դոնբասում։
«Այս դժվար ժամերին մենք մտածում ենք Ուկրաինայի կանանց, տղամարդկանց և երեխաների մասին, ովքեր բախվել են չպատճառաբանված հարձակման և վախի՝ իրենց կյանքի համար: Մենք պատասխանատվության կենթարկենք Կրեմլին», - գրել է Ֆոն դեր Լեյենը՝ Twitter-ի իր էջում: ՄԱԿ-ի նիստից հետո Կանադայի վարչապետ Ջասթին Թրյուդոն Մոսկվային դատապարտող հայտարարություն է տարածել։ «Կանադան ամենախիստ կերպով դատապարտում է Ռուսաստանի բացահայտ հարձակումն Ուկրաինայի վրա: Այս գործողությունները Ուկրաինայի ինքնիշխանության և տարածքային ամբողջականության նոր և ակնհայտ խախտում են»,- ասվում է փաստաթղթում:
