Այս հինգ տները նոր իմաստ ու բովանդակություն են հաղորդում ծավալատարածական ձևերի հավասարակշռման ճարտարապետական սկզբունքներին: Հաճախ այս լուծումներն այնքան էլ պրակտիկ չեն, բայց, անկասկած, ապշեցնում են ժամանակակից ճարտարապետների մտքի թռիչքով և հաստատում այն համոզմունքը, որ ճարտարապետությունն այսօր, ստեղծագործական մտքի և տեխնոլոգիական հնարավորությունների տեսանկյունից, հասել է աներևակայելի բարձունքների:

«Clavel Arquitectos Asociados»-ի «Խաչվող տունը» իսպանական Մուրիկայում, թվում է, շատ բարդ կառուցվածք ունի, սակայն այդ տպավորությունը տփանման դարակների ձևից է: Այս «Խաչվող տան» դեպքում թե՛ բետոնը, թե՛ կլորավուն ծայրերով բլոկները նույն չափերի են՝ 19,8 մ երկարությամբ և 4,8 մ լայնությամբ, իսկ վերևի բլոկը 35 աստիճան անկյան տակ նստեցված է հատակի մակարդակին տեղադրված բլոկին, և, այդպիսով, արևոտ եղանակին լողավազանի հատվածը հնարավորինս ստվերում է հայտնվում: 

Հոլանդական «MVRDV» ստուդիայի նախագծած մետաղյա «Հավասարակշռող տունը» կտրուկ հակադրության մեջ է իրեն շրջապատող բրիտանական Սուֆոլկի կուսական բնության համայնապատկերի հետ: Այն, իր ուղղանկյուն ձևով և երկթեք տանիքով, ավանդական կառուցվածք ունի, բայց գործնականում միտումնավոր կախված է զառիթափ լանջի եզրից: Տունը ցած չի ընկնում քամոտ եղանակին, որովհետև 15 մ երկարությամբ, հատակին կպած հատվածը կառուցվել է ավելի ծանր նյութերով, քան՝ բարձակային հատվածը: 

Ավստրալիայի Մելբուրն քաղաքի «View Hill» տնից, որը կառուցել է Դենտոն Կորկեր Մարշալը, բացվում է իր անվանը համահունչ հիասքանչ տեսարան՝ դեպի բլուրը, հատկապես՝ դեպի գինեգործական Յարա հովիտը, որի վրա էլ հենց տունը տեղադրված է: Իրարից առանձնացված, երկու բեռնափոխադրման կոնտեյներ հիշեցնող այս կտորները, որպես այդպիսին, ոչնչով չեն առանձնանում, սակայն, համադրության մեջ, իսկական ճարտարապետական գոհարներ են: Կտորներից մեկը չժանգոտված պողպատից է, իսկ մյուսը, որը, ըստ էության, կախված է ներքևում գտնվող պողպատյա կտորից, պատված է սև ալյումինով։

Կիևում տեղակայված «Yousupova» ստուդիայի ճարտարապետները ստեղծել են այս գլուխգործոցը Լեհաստանի Ձակոպանեի խիտ և խորհրդավոր անտառներում: Թեև այս կառույցը ժամանակակից է արտացոլող ապակի ունեցող բարձակային իր տախտակամածով, այն գրեթե միախառնվում է շրջապատող լեռան հետ՝ քարի և փայտի ներդաշնակ համադրության շնորհիվ: 

Կանադայի Տորոնտո քաղաքում գտնվող «Սիդարվալե հովիտ» կոչվող տունը, որը կառուցել է «Drew Mandel Architects» ստուդիան, բավարարում է կառույցի համար կարևոր համարվող հիմնական պահանջները՝ հիացնելով մոտակայքում գտնվող Սիդարվալե հովտի վրա բացվող տեսարաններով և բնական լույսի իրական տարափով: Առաջին հարկը, որը գողտրիկ ներտարածքի և պարտեզի համադրություն է, տանում է դեպի կառույցի կողային մասում տեղակայված ապակեպատ տարածք: Իսկ երկրորդ հարկն, իր հերթին, նստեցված է ցինկապատ բարձակային կոնստրուկցիայի վրա, և այնտեղից հիանալի տեսարան է բացվում դեպի ներքևում գտնվող լողավազանը: Այս տունը, հիրավի, մոդեռնիստական ճարտարապետության գեղագիտությանն ու մոտեցումներին վայել կառույց է: