«Բրիջերթոն» (Bridgerton)
2020-ի ձմռանը «Բրիջերթոն» սերիալը գրավեց բոլորի սրտերը: Այն նկարահանվել է Ջուլիա Քինի գրքերի հիման վրա։ Ռեգենտության ժամանակաշրջանի հագուստներով բեմադրված դրաման արագորեն դարձավ Netflix-ի ամենադիտված սերիալը (այս դափնին այժմ պատկանում է «Կաղամարի խաղը» սերիալին) և ձեռք բերեց հավատարիմ երկրապագուների բանակ: Առաջին սերիաների ընթացքում Դաֆնի Բրիջերթոնի և Հեյսթինգսի դուքսի սիրավեպը ծավալվում է Լոնդոնի բարձրաշխարհիկ հասարակության հետաքրքրաշարժ դրամայի ֆոնին, որը մեկնաբանվում է հեղինակի՝ խորհրդավոր սյունակագիր Լեդի Ուիսլդաունի կողմից: Այս 200-ամյա «բամբասկոտ աղջկա» ով լինելը պարզ է դառնում առաջին եթերաշրջանի վերջում: Այնպես որ, եթե որոշեք դիտել երկրորդ եթերաշրջանը, համոզվեք, որ ծանոթացել եք առաջին եթերաշրջանի ութ սերիաների բովանդակությանը: Այս նոր եթերաշրջանը կենտրոնանալու է Դաֆնիի ավագ եղբոր՝ Էնթոնիի և նրա սիրային փնտրտուքների վրա: Հեյսթինգսի դքսի դերակատար Փեյջը թեև չի շարունակում իր մասնակցությունը սերիալին, այնուամենայնիվ, նոր դերասանական կազմը բավականին տպավորիչ է: Նախատեսվում է նկարահանել նաև երրորդ և չորրորդ եթերաշրջանները, որը կունենա փրիքվել՝ կենտրոնացած թագուհի Աննայի կերպարի վրա:
«Բրիջերթոն»-ի երկրորդ եթերաշրջանը կթողարկվի մարտի 25–ին՝ Netflix հարթակում:
«Լուսնի ասպետը» (Moon Knight)
Marvel Cinematic Universe-ի նոր՝ «Լուսնի ասպետը» ֆիլմի գլխավոր դերակատարն է Օսկար Այզեկը, որը համալրեց Marvel ընտանիքի կերպարները մարմնավորած դերասանների աստղաբույլը: «Լուսնի ասպետը» Սթիվեն Գրանտի ալտեր-էգոն է. առերևույթ հասարակ մի մարդու, որն աշխատում է Լոնդոնի թանգարանի հուշանվերների խանութում: Սակայն, հիշողության կորստի դրվագներ ապրելուց հետո, նա ինքն իրեն չի ճանաչում: Գրանտի մոտ ախտորոշում են ինքնության դիսոցիատիվ խանգարում, և նա, պարզում է, կիսում է իր մարմինը վարձկան Մարկ Սփեկտորի հետ: Այս կերպարը առաջին անգամ հայտնվել է Marvel-ի կոմիքսներում՝ 70-ականներին, և այս եթերաշրջանը կներկայացնի Գրանտի/Սփեկտորի/Լուսնի ասպետի պայքարը Եգիպտոսի հզոր աստվածների դեմ: Այս դինամիկ թրիլերի մյուս դերակատարներն են Էթան Հոակը և Մեյ Քալամաուին:
«Լուսնի ասպետը» սերիալի համաշխարհային պրեմիերան տեղի կունենա մարտի 30-ին՝ Disney+ հարթակում:
«Պաչինկո»
Մին Ջին Լիի «Պաչինկո» վեպը 20-րդ դարի կորեական ընտանիքի մի քանի սերունդների պատմությունն է, որն ընդգրկվել է New York Times-ի լավագույն վաճառված գրքերի ցանկում և 2017-ին նոմինացվել «Միացյալ Նահանգների լավագույն գիրք» մրցանակի համար: Ավելին, այն «գովազդել» է անգամ նախագահ Բարաք Օբաման՝ իր ֆեյսբուքյան էջում: Այժմ Apple TV+ հարթակը ադապտացրել է այս սիրված ստեղծագործությունը՝ ստեղծելով սահմանափակ քանակով եռալեզու սերիաները: Ֆիլմի հեղինակն է «Սարսափ» սերիալի գործադիր պրոդյուսեր Սու Հյուն:
«Պաչինկո»-ի առաջին երեք սերիաները կցուցադրվեն մարտի 25-ին՝ Apple TV+ հարթակում, իսկ մնացած սերիաներն՝ ամեն շաբաթ:
«Ոտքի կանգնելը» (Standing Up)
«Զանգե՛ք իմ ներկայացուցչին» սերիալի երկրպագուների համար (որի շարունակությունը ընթացքի մեջ է) «Ոտքի կանգնելը» կարող է լրացնել ֆրանսալեզու կատակերգական ֆիլմերի բացը, քանի որ հիթ դարձած սերիալի հեղինակն ու սցենարի հեղինակը նույն ինքը Ֆանի Հերերոն է: Սերիալը պատմում է փարիզյան կատակերգական ակումբի և նրա չորս կատարողների մասին, որոնցից բոլորը ունեն տարբեր պատմություններ և իրենց կարիերայի տարբեր փուլերում են գտնվում: Այն խոստանում է բացահայտել կատակերգական ժանրի դառը իրականությունը և այն, թե ինչի կվերածի մարդու կյանքը հաջողությունը կամ դրա բացակայությունը, ինչպես նաև՝ այն, թե ինչ ընկերության տեսակների է հանդիպում մարդը՝ այդ ամենի միջով անցնելիս:
«Ոտքի կանգնելը» կցուցադրվի մարտի 18-ին՝ Netflix հարթակում:
«Ատլանտա» (Atlanta)
Դոնալդ Գլովերի՝ քննադատների կողմից հավանության արժանացած սերիալը վերադառնում է էկրաններ՝ չորս տարի դադարից հետո, համավարակի հարուցած հետաձգումների պատճառով: Այս էքսցենտրիկ կատակերգական դրամայի վերադարձը երկար սպասված էր երկրպագուների համար, որոնք «փշերի վրա» սպասում էին, թե երբ կպարզեն՝ ինչ պատահեց ռեփեր Ալֆրեդ «Paper Boi» Մայլսին, իր մենեջեր Իմին և աջ ձեռք Դարիուսին: Երկրորդ եթերաշրջանը ավարտվեց եռյակի ինքնաթիռային տեսարանով, որով նրանք պետք է ուղևորվեին Ալֆրեդի եվրոպական շրջագայությանը, և եվրոպական մայրցամաքը պետք է որ լիներ իրադարձությունների զարգացման նոր վայրը: Հետաքրքրական է, որ չորրորդ եթերաշրջանը նկարահանվել է երրորդի հետ զուգահեռ և կլինի վերջինը:
«Ատլանտա» սերիալի պրեմիերան կկայանա մարտի 24-ին՝ FX հարթակում:
