Երևանի ընտրություններ - 2023
«Եթե այսօր հիմքերը ճիշտ դնենք, վստահ եմ՝ ապագայում շատ ավելի ուժեղ սերունդ ենք մեծացնելու». Տիգրան Ավինյան
ՔՊ Երևանի քաղաքապետի թեկնածու Տիգրան Ավինյանն այսօր շարունակել է նախընտրական հանդիպումներն Ավան վարչական շրջանում։
Ավինյանը հայտարարել է, թե մանկապարտեզներին ու դպրոցներին ուղղված իրենց ծրագրերը երեխաների, ապագա սերնդի համար է արվում։ «Մենք Երևանում այս տարի միայն հիմնանորոգում ենք 24 մանկապարտեզ, և դրանք հիմնանորոգելով ստեղծում ենք լավագույն պայմանները երեխաների համար։ Մենք սարքում ենք ֆուտբոլի դաշտեր, բակեր։ Եւ իրականում սրանք ուղղակի բարեփոխումներ չեն, ուղղակի վերանորոգումներ ու հիմնանորոգումներ չեն, սրանք միջավայր են»,- ասաց նա։
Տիգրան Ավինյանը վստահեցրել է, որ Երևանում կառուցվում են սեյսմակայուն և ամենաբարձր ստանդարտներին համապատասխանող դպրոցներ, որոնք էլ պայմաններ են ստեղծում, որ երեխաները մեծանան ու դառնան ոգով, մարմնով, գիտելիքներով ուժեղ. «Իրականում սա ամենակարևոր, ամենակարևոր գործն է, որ պետք է անենք»։
Ըստ նրա, մարդկանց վերաբերմունքը սկսած սեփական բակի, սեփական փողոցի նկատմամբ, մինչև անվտանգային և սահմանային հարցեր, սկսվում է մանկապարտեզից. «Եթե մենք այսօր այդ հիմքերը ճիշտ դնենք, վստահ եմ, որ ապագայում շատ ավելի ուժեղ սերունդ ենք մեծացնելու, շատ ավելի ուժեղ երկիր ենք ունենալու, և իրենց շնորհիվ այս երկիրն ավելի ու ավելի է ամրապնդելու իր դիրքերը ոչ միայն տարածաշրջանում, այլև աշխարհում»,- նշեց նա։
Ավինյանը կարևորել է նաև մանկապարտեզների ոչ միայն միջավայրը, այլև բովանդակությունը. «Շատ կարևոր են մարդիկ, ովքեր ամեն օր իրենց քրտնաջան աշխատանքով դաստիարակում են մեր երեխաներին։ Էդ մարդկանց աշխատանքը կարևորելու, արժևորելու կարիք կա»։
