Երևանի քաղաքապետարանի գործակարգավարական նիստում քաղաքապետ Տիգրան Ավինյանը հայտարարել է, որ մանկապարտեզների վերանախագծման մրցույթները չորս անգամ չեն կայացել։
«Մրցույթը երկու անգամ չկայանալուց հետո պետք էր բանակցություն վարել, և միգուցե պետք էր հրաժարվել։ Չի կարող մեր մանկապարտեզների նախագծման գործընթացը այսպես տարիներ տևել։ Այս դեպքում ժամանակը շատ ավելի կարևոր է, քան ֆինանսավորումը»,– ասել է նա։
Քաղաքապետի խոսքով՝ «Այս մի քանի մանկապարտեզի ֆինանսավորման հարցը մենք վստահորեն կարող ենք լուծել, հետևաբար խնդրում եմ սեղմ ժամկետներում գործընկերների հետ հասկանալ՝ իրար հետ աշխատում ենք, թե չենք աշխատում»։
Նա հանձնարարել է ճշտել խնդրի պատճառը. «Կամ ֆինանսավորման չափն է խնդիր, որ չորս անգամ չի կայացել, կամ ինչ-որ բան է տեխնիկական առաջադրանքում գրված, որ բոլորի մոտ հարց է առաջացնում ու չեն մասնակցում, կամ չգիտեմ ինչ»։
