Երևան
«Երևանի պատվավոր քաղաքացի» կոչում կշնորհվի Ավետիք Իսահակյանին, Մարկ Գրիգորյանին և Տարոն Մուրադյանին
Երևան քաղաքի ավագանին որոշել է Երևան քաղաքի 2807-րդ տարեդարձի առթիվ «Երևանի պատվավոր քաղաքացի» կոչում շնորհել քաղաքի արվեստի զարգացման գործում ներդրած նշանակալի ավանդի համար գրականագետ, բանասիրական գիտությունների դոկտոր, պրոֆեսոր, ՀՀ արվեստի վաստակավոր գործիչ Ավետիք (Ավիկ) Վիգենի Իսահակյանին, լրագրող, մանկավարժ, հասարակական և մշակութային գործիչ Մարկ Վլադիմիրի Գրիգորյանին և հայ նկարիչ Տարոն Արտավազդի Մուրադյանին։
Նշենք՝ Ավետիք Իսահակյանը ծնվել է 1944 թվականի նոյեմբերի 27-ին, Երևանում։ Նա հայ բանաստեղծ, արձակագիր Ավետիք Իսահակյանի թոռն է: Պատրաստել է հրատարակության, կազմել, խմբագրել և առաջաբան է գրել Ավ. Իսահակյանի քսանից ավել գրական երկերի, որոնք հրատարակվել են Երևանում, Մոսկվայում, Վենետիկում, Լոս Անջելեսում, Դամասկոսում: Մարկ Գրիգորյանը ծնվել է 1958 թվականի մայիսի 3-ին, Երևանում։ Լրատվամիջոցների կովկասյան ինստիտուտի (ներկայիս «Կովկաս» ինստիտուտ) հիմնադիրներից մեկն է։ Աշխատել է Լոնդոնում, BBC-ի ռուսական ծառայության «Վաղ ժամ» ծրագրում։ Մինչ 2011 թվականի մարտի 11-ը Սևա Նովգորոդցևի հետ վարել է «Բիբիսեվա» ծրագիրը։ Տարոն Մուրադյանը ծնվել է 1961 թվականի դեկտեմբերի 26-ին, Երևանում։ 2001 թվականից Հայաստանի նկարիչների միության անդամ է: Տարոն Մուրադյանի ստեղծագործությունները մշտապես ցուցադրվում են Երևանի ժամանակակից արվեստի թանգարանում, «Արամե» պատկերասրահում:
