Երևան քաղաքի 2024 թվականի բյուջեի փաստացի եկամուտները կազմել են 116 մլրդ 715 մլն դրամ կամ պլանավորածի 103.1%-ը, որից սեփական եկամուտները կատարվել են 113.1 %-ով. ԱԺ-ում 2024թ․ բյուջեի կատարողականի քննարկման ժամանակ հայտնել է քաղաքապետ Տիգրան Ավինյանը։
«Այսինքն, Երևանի քաղաքապետարանը իր սեփական եկամուտները 13.1%-ով ավել է հավաքագրել՝ 71 մլրդ 199 մլն դրամ։ Միաժամանակ նշեմ, որ սեփական եկամուտների փաստացի հավաքագրումն ավել է 2023 թվականի փաստացի ցուցանիշից 21 մլրդ 100 մլն դրամով»,- նշել է Ավինյանը։
Պետական բյուջեից տրամադրվող պետական հատկացումներն ու սուբվենցիաները կազմել են 955 մլն դրամ, պետության կողմից տեղական ինքնակառավարման մարմիններին պատվիրակված լիազորությունների իրականացման ծախսերի ֆինանսավորման համար պետբյուջեից ստացվող միջոցները, նախատեսված 34 մլրդ-ի փոխարեն, փաստացի մուտքագրվել է 30 մլրդ, իսկ ֆինանսական համահարթեցման սկզբունքով տրվող դոտացիան և Երևանի քաղաքապետարանի սեփական լիազորությունների իրականացման համար տրամադրվող դոտացիան նախատեսվել և մուտքագրվել է, համապատասխանաբար, 8.4 և 4.8 մլրդ դրամ։
«Ուզում եմ ասել, որ տարեկան տենդենցը պետական այս տեսակի աջակցություններում գնալով նվազում է, և Երևանի քաղաքապետարանը իր սեփական եկամուտներն է ավելացնում»,- հայտնել է Երևանի քաղաքապետը։
