Երևան

Մետրոպոլիտենի վեց կայարաններում տեղադրվել են հուզական աջակցության թեժ գծի վերաբերյալ պաստառներ

Հաշվի առնելով այն, որ Հոգեկան առողջության իրազեկման ամիսը (Mental Health Awareness Month) նշվում է ամեն տարի մայիսին, Երևանի քաղաքապետարանն, ի դեմս աշխատակազմի երեխաների և սոցիալական պաշտպանության վարչության, համագործակցում է «Հոգեկան առողջության իրազեկման նախաձեռնություն» հասարակական կազմակերպության հետ, որը քաղաքապետարանի աջակցությամբ իրականացնում է «Հուզական աջակցության թեժ գիծ» փորձնական ծրագիրը:

Ծրագիրը նպատակ ունի բարձրացնել հասարակության իրազեկվածությունը հոգեկան առողջության կարևորության, հոգեկան մարտահրավերների, ինչպես նաև բուժման և աջակցման հնարավորությունների վերաբերյալ։

Ինչու՞ է սա կարևորվում քաղաքապետարանի կողմից.

•    խարանի հաղթահարում. շատերը դեռևս ամաչում են խոսել իրենց հոգեկան առողջությանն առնչվող խնդիրների մասին։ Այս ամիսը օգնում է խախտել լռությունը,
•    իրազեկում և ուղղորդում. տրամադրվում են տեղեկություններ, որոնց միջոցով մարդիկ կարող են իմանալ հոգեբանական/հոգեկան առողջությանն առնչվող խնդիրների նշաններն ինչպես իրենց, այնպես էլ իրենց հարազատների շրջանում,
•    աջակցություն և հասանելիություն. ուշադրություն է դարձվում աջակցության հնարավորություններին՝ թեժ գծի, անվճար խորհրդատվությունների և տարբեր իրազեկող միջոցառումների ձևով՝ ապահովելով հասանելիություն։

Հոգեկան առողջության իրազեկման ամիսը՝ մայիսը, կարևորվում է մեր կողմից՝ նպատակ ունենալով բարձրացնել հասարակության իրազեկվածությունը հոգեկան առողջության վերաբերյալ։ Այս նախաձեռնությունը միտված է մարդկանց իրազեկելուն, խարանը հաղթահարելուն և նրանց հորդորելու՝ հոգ տանել սեփական հոգեկան առողջության մասին։

Երևանի քաղաքապետարանը համագործակցությամբ Երևանի մետրոպոլիտենի վեց կայարաններում տեղադրել է գովազդային 7 պաստառ հուզական աջակցության անվճար «Թեժ գծի» վերաբերյալ, որը բոլոր քաղաքացիներին հնարավորություն է տալիս խոսելու հոգեկան առողջության մասին իրենց հուզող բոլոր հարցերի կապակցությամբ և ստանալու համապատասխան ուղղորդում կամ աջակցություն՝ հատուկ վերապատրաստում անցած մասնագետների կողմից:

Երևանի քաղաքապետարանի կողմից իրագործվող ծրագիրը և իրազեկման այս նախաձեռնությունը կարևոր քայլ է հոգեկան առողջության շուրջ բաց, խարանից զերծ երկխոսություն ստեղծելու և այն որպես ընդհանուր բարեկեցության բաղկացուցիչ մաս ընկալելու առումով։