Երևան
«Չգիտես՝ շենքը երբ կփլվի, բայց կփլվի վստահաբար». քաղաքապետ (ՏԵՍԱՆՅՈՒԹ)
«Միշտ պետք է հիշենք, որ այս ծրագրերում Երևանը որևէ պարտավորություն չունի, սա բարի կամքի դրսևորում է, սա երևանցիների անվտանգության խնդրի լուծում եմ համարում»,- հայտարարել է Երևանի քաղաքապետ Տիգրան Ավինյանը՝ անդրադառնալով Արզումանյան փողոցի 4-րդ կարգի վթարային շենքերի բնակիչների խնդրին։
Հիշեցնենք, այդ շենքերը նախատեսված է քանդել, փոխարենը նորակառույց կառուցել, իսկ այդ շենքի բնակիչներին այդտեղ կտրամադրվեն բնակարաններ։
«Բնակիչները դեմ են այս գործընթացին. խոսքը գնում է 4-րդ կարգի ռիսկայնության շենքի մասին, որը չգիտես՝ երբ կփլվի, բայց որ կփլվի, վստահաբար»,- ասել է նա՝ հավելելով, որ այդ բնակարանների արժեքը 0-ին մոտ է. «Զրո արժեք ունեցող բնակարանների համար Երևանի քաղաքապետարանը նախագծել է ծրագիր, որով բնակիչներին միաժամանակ վարձի գումար է փոխհատուցվելու, որից հետո նույն տեղում կառուցված շենքում նույն բնակիչներին արդեն արժեքավոր բնակարաններ են տրամադրվելու»։
Ավինյանը նաև նախազգուշացրել է, որ այս գործընթացի ձգձգման դեպքում հնարավոր է՝ քաղաքապետարանն առհասարակ հրաժարվի այդ ծրագրից։
