Երևանի հյուսիսային բարձրադիր վարչական շրջաններում՝ Ավանում, Նոր Նորքում, Նորք-Մարաշում, Քանաքեռ-Զեյթունում և Արաբկիրի մի հատվածում ձյան թույլ տեղումներից հետո ճանապարհները մշակվել են աղ ու ավազի խառնուրդով: Աշխատանքային հերթական խորհրդակցությանը քաղաքապետ Տիգրան Ավինյանը հանձնարարել է հատուկ ուշադրություն դարձնել մայթերին: Զեկուցվել է, որ բոլոր տնտեսվարողներն զգուշացված են՝ ապահովելու պարտադիր բարեկարգման պահանջը: Նշենք, որ համայնքն այս տարի 50 միավոր մայթ մաքրող տեխնիկա է ձեռք բերել:  
***
Երևանի մետրոպոլիտենի ուղևորափոխադրումը ավելի հարմարավետ կազմակերպելու համար դեկտեմբերին գիծ է դուրս բերվել ևս մեկ 3 վագոնանի շարժակազմ։ Մինչև հունվարի 15-ը ևս երկու՝ 3 վագոնով շարժակազմ դուրս կգա ուղեգիծ:
***
Ավարտվել է Մուշական թաղամասի 4600մ կոյուղատարի շինարարությունը: 
***
Ավարտվել է նաև Ծիծեռնակաբերդի հուշահամալիր տանող ճեմուղու բարեկարգումը: Ճանապարհահատվածը ավտոկայանատեղիի չվերածելու համար  հանձնարարվել է պարեկային ծառայության հետ համապատասխան աշխատանքներ տանել:
Այս շաբաթ կմեկնարկի Ալ. Թամանյանի հուշարձանի հարակից տարածքի բարեկարգումը:
***
Կոնդ թաղամասի բնակիչների շենք-շինությունների օրինականացման և սեփականության վկայականների տրամադրման գործընթացի վերաբերյալ զեկուցվել է, որ այս պահին առկա է 211 դիմում:
***
Բազմաբնակարան բնակելի շենքերի վերելակների փոխարինման համար կհայտարարվի 100 վերելակի մրցութ: Բացի այդ, գույքագրվել է ևս  400 վերելակ, որոնք նախատեսվում է փոխարինել նորերով:
***
Առցանց քարտեզներում հանրային փոխադրամիջոցի տեղաշարժն ապահովելու նպատակով հատուկ սարք է տեղադրվել 448 շարժակազմում: 
***
Տնկարանային տնտեսության ընդլայնման, զարգացման, արդիականացման միջոցառումները բաժանված են 3 փուլի: 
Տնկարանի՝ շուրջ 3000 խմ ծավալով ջրամբարը արդեն պատրաստ է, այժմ փորձարկվում է: Զուգահեռաբար ընթանում է պոմպակայանի կառուցումը, պատրաստ են նաև 2000 գծմ ցանկապատի հիմքերը: Շուրջ 15 հեկտարում հողահարթեցման և փխրեցման աշխատանքներ են իրականացվում:
Զեկուցվել է նաև, որ կանաչապատման աշնանային աշխատանքների ընթացքում քաղաքի մի շարք փողոցներում ու պողոտաներում տնկվել է 200 արժեքավոր ծառատեսակ և 6000 թուփ: 
Տարվա ընթացքում մայրաքաղաքում հիմնված անտառ-տնկարկներում կպչողականությունը եղել է 95 տոկոս: 
Էտվել է 11 391 ծառ. հավաքված ճյուղերը, որպես վառելափայտ, տրամադրվելու են սոցիալապես անապահով ընտանիքներին: 
***
2023թ. Երևանի քաղաքապետարանի սպորտի և երիտասարդության հարցերի վարչության կողմից անցկացվել է 11 միջազգային և 16 քաղաքային մրցաշար՝ ընբշամարտ, բռնցքամարտ, հնգամարտ, ձյուդո մարզաձևերից և մարմնամարզությունից: Մարզական մի շարք այլ միջոցառումներ են անցկացվել նաև դպրոցականների, տարեցների և հաշմանդամություն ունեցող անձանց համար: 
Քաղաքապետ Տիգրան Ավինյանն ընդգծել է, որ քաղաքապետարանը կշարունակի կազմակերպել մարզական միջոցառումներ, կխրախուսվեն մարզիկներն ու մարզիչները:
***
Հրազդանի կիրճում մարզվող քաղաքացիների անվտանգությունն ապահովելու և առողջ ապրելակերպը խրախուսելու նպատակով վերականգնվել է շաբաթ և կիրակի օրերին՝ ժամը 06:00-23:00-ն երթևեկության արգելումը կիրճի՝ «Ֆլորենս» ռեստորանային համալիրից դեպի «Նոր Արաբկիր» զբոսայգու ուղղությամբ՝ 2.5 կմ ճանապարհահատվածում:
***
Սիգ ձկնատեսակի որսի արգելքով պայմանավորված՝ հանձնարարվել է մինչև Ամանոր առավել ուժեղացնել հսկողությունը: