Երևան
Շինհրապարակների շրջակայքում հնարավորություն կստեղծվի տեղեկատվություն ստանալ օդի աղտոտվածության վերաբերյալ
Մայրաքաղաքում հնարավորություն կստեղծվի հատուկ սարքերով հենց շինհրապարակների շրջակայքում տեղեկատվություն ստանալ օդի աղտոտվածության վերաբերյալ: Սեպտեմբերից ուժի մեջ մտած ավագանու որոշմամբ էլ Երևանում շինհրապարակներում պետք է պարտադիր կերպով տեղադրվեն փոշեկլանիչ ցանցեր: Աշխատանքային հերթական խորհրդակցության ժամանակ զեկուցվել է, որ կառուցապատողներին ծանուցելու գործընթացն ավարտական փուլում է: Քաղաքապետ Տիգրան Ավինյանն ընդգծել է, որ ծրագիրն ամենակարևորներից է և համայնքին վերահսկողություն իրականացնելու հնարավորություն է տալիս:
***
Մայրաքաղաքում առկա վթարային շենքերի խնդրին համալիր լուծում տալու նպատակով իրականացվել են գույքագրման աշխատանքներ: Զեկուցվել է, որ այս պահի դրությամբ Երևանում 4-րդ աստիճանի վթարայնության 14 շենք կա, 3-րդ աստիճանի վթարայնության շենքերի թիվը 107 է: Քաղաքապետը հանձնարարել է բնակիչների վերաբնակեցման խնդիրը լուծելուց անմիջապես հետո 4-րդ կարգի վթարային շենքերն ամբողջությամբ ապամոնտաժել:
***
Մայրաքաղաքում workout մարզաձևը զարգացնելու նպատակով բոլոր վարչական շրջաններում կառուցվել են հատուկ մարզահրապարակներ: Ընդհանուր առմամբ մարզասարքեր են տեղադրվել է 24 բակային տարածքում:
***
Ընթացքում է Նորք-Մարաշը Սարալանջին կապող նոր ճանապարհի շինարարությունը: Քարքարոտ ու անանցանելի այս հատվածը կդառնա շուրջ 1.4 կմ երկարությամբ ու 7մ լայնությամբ ժամանակակից ճանապարհ: Ծրագրով տարածքում կապահովվեն նաև ենթակառուցվածքներ. հարակից տնտեսվարողներն անցկացնում են կոյուղատար համակարգ, ճանապարհը կունենա նաև ջրահեռացման համակարգ:
***
Անցած շաբաթվա ընթացքում Երևանում ապամոնտաժվել է ինքնակամ տեղադրված 645 արտաքին գովազդ:
***
Հիմնանորոգվում է Դավթաշենի 1-ին և 2-րդ թաղամասերի միջև գտնվող կենտրոնական այգին: Հանգստի գոտին կունենա արտաքին լուսավորության ու ոռոգման նոր համակարգ, հարմարավետ զրուցատաղավարներ, հովանոցներ, նստարաններ ու աղբամաններ, կկառուցվի նաև շատրվանային համալիր:
***
2023թ. նոյեմբերի 30-ի դրությամբ Երևանի բյուջեի սեփական եկամուտների գծով փաստացի մուտքերը կազմել են 38 մլրդ 314 մլն դրամ: Նախորդ տարվա նույն ժամանակահատվածի նկատմամբ ավելի է գանձվել 8 մլրդ 373 մլն դրամ:
«Երևանի բյուջեն իրապես թերհամալրված է, և թերհամալրված է տասնամյակներով: Խոսքը միայն Երևանի մասին չէ, այլև ՀՀ բոլոր քաղաքների, որոնք տասնամյակներով բյուջեի հետ կապված որոշակի խնդիրներ են ունեցել: Իրականում մենք ունենք առաջարկվող լուծումներ: ՀՀ ֆինանսների նախարարության հետ կա պայմանավորվածություն՝ ֆինանսական ապակենտրոնացման վերաբերյալ քննարկումներ սկսելու վերաբերյալ, և Երևանն ու ՀՀ բոլոր խոշորացված համայնքները կունենան միջոցներ, որպեսզի կարողանան իրենց ենթակառուցվածքները պահպանել և ոչ թե մաշեցնել: Եվ ես վստահ եմ, որ սա է այն ճանապարհը, որով ՀՀ բոլոր քաղաքները լրջորեն կառուցապատման կանցնեն ու տեղային լուծումների փոխարեն կունենանք կառուցվածքային առումով վերջնական համակարգ»,- ընդգծել է քաղաքապետ Ավինյանը:
