Երևան
«Այս ծրագրերը քաղաքապետարանի պարտականությունը չեն, բանակցային շրջանակն էլ կոնկրետ պիտի լինի». Տիգրան Ավինյան (ՏԵՍԱՆՅՈՒԹ)
Արզումանյան 10 և 17 վթարային շենքերի ծրագրի առնչությամբ Երևանի փոխքաղաքապետ Սուրեն Գրիգորյանն ասաց, որ բնակիչների հետ համաձայնության փուլում է պայմանագրի տեքստը, նաև կառավարության որոշման անհրաժեշտություն է առաջացել, և քննարկումների պատճառով ժամկետներ են բաց թողնվել։
Նրա խոսքով՝ բնակիչների ներկայացուցիչների հետ վերջին անգամ կքննարկվեն իրենց դիտարկումները, և ավարտական տեսքի կբերվեն փաստաթղթերը, որոշման նախագիծը ուղարկվի կառավարություն, ու կկնքվեն պայմանագրերը։
Քաղաքապետ Տիգրան Ավինյանն այս համատեքստում ասաց.
«Նախորդ շաբաթ Արցախի նրբանցքի 4-րդ կարգի վթարային շենքերում բնակվող բնակիչներին հանձնեցինք բնակարանների գնման վկայականներ: Սա շատ կարևոր ծրագիր է, որ քաղաքն իրականացնում է, չնայած նմանատիպ ծրագրեր իրականացնելու փաստացի պարտավորություն, որպես այդպիսին, Երևան քաղաքը չունի: Այնուամենայնիվ, երևանցիների անվտանգությունը մեզ համար առաջնահերթություն է, բայց տեսեք․ Արզումանյան 10 և 17 վթարային շենքերի ծրագրերը սկսել էինք ավելի վաղ։ Բայց այս քննարկումները բնակիչների հետ չեն կարող անվերջ լինել՝ համոզելու, որ իրենք ապրում են 4-րդ կարգի վթարային շենքում, որը ոչ շատ հեռավոր ապագայում կարող է փլվել։ Այս ծրագրերը քաղաքապետարանի պարտականությունը չեն, բանակցային շրջանակն էլ կոնկրետ պիտի լինի։ Առաջարկվող պայմանները էականորեն լավն են եղածի համեմատ»։
