Երևան
Հեղափոխության արժեքների պաշտպանության դիրքերից հանդես եկող ուժերը ստացել են ձայների գերակշիռ մեծամասնությունը․ Տիգրան Ավինյան (ՏԵՍԱՆՅՈՒԹ)
Երևանի ավագանու ընտրությունների արդյունքները շատ հարցերի շուրջ մտածելու տեղիք են տալիս․ իր ելույթում հայտարարել է Երևանի քաղաքապետի թեկնածու Տիգրան Ավինյանը։
Նրա խոսքով, ընտրությունները տվեցին նաև մի շարք սկզբունքային հարցերի պատասխաններ և արձանագրեցին կարևոր իրողություններ․ «Ընտրությունների պաշտոնական արդյունքները ճշգրիտ են արտահայտում ընտրական տեղամասեր գնացած քաղաքացիների քվեարկության պատկերը: Այն աստիճանի, որ մանդատների բաշխման քարտեզը սկզբունքային այլ տեսք կունենար, եթե 53 քվեներ մի փոքր այլ կերպ բաշխվեին: Խոսուն է փաստ է նաև այն, որ որևէ քաղաքական ուժ չի բողոքարկել ընտրության արդյունքները»:
Ըստ Ավինյանի, ընտրությունների արդյունքները, քարոզարշավի և քվեարկության ընթացքում էական խախտումների բացակայությունը՝ 2018 թվականի ժողովրդական, ոչ բռնի, թավշյա հեղափոխության արժեքներին «Քաղաքացիական պայմանագիր» կուսակցության որդեգրած սկզբունքների ապացույցն են։
«Միևնույն ժամանակ պետք է արձանագրել, որ 2018 թվականի Հեղափոխության արժեքների պաշտպանության դիրքերից հանդես եկող ուժերը ընտրությունների արդյունքներով ստացել են ձայների գերակշիռ մեծամասնությունը:
Անկախ այն բանից, թե այդ ուժերը նախընտրական շրջանում ինչ կարծիք են հայտնել միմյանց նկատմամբ, ընտրողների առաջ նրանք հանդես են եկել որպես Հեղափոխության արժեքների կրող ու պաշտպան, և հետևաբար, քաղաքացիների գերակշիռ մեծամասնությունն իր ձայնը տվել է Հեղափոխությանը և Հեղափոխության մեծագույն ձեռքբերում հանդիսացող ժողովրդավարությանը։ Ուստի, ցանկացած փորձ, այդ ձայները կիսելու ապապետական, կոռումպացված և հակաժողովրդավարական ուժերի հետ, կնշանակի քաղաքացիների տված քվեի բռնազավթում՝ հակաժողովրդավարական ուժերի կողմից»,– ասել է նա։
Ավինյանը տեսակետ է հայտնել, որ ընտրությունների արդյունքներով Հեղափոխությանը տրված վստահության քվեն պետք է արտահայտվի․ «Եվ դա կարևոր է ոչ միայն Հեղափոխությանը քվեարկած ընտրողների ձայները հակահեղափոխության դիրքերից հանդես եկողների, Հայաստանի անկախությունն ու ինքնիշխանությունը կասկածի տակ դնողների նպատակներին չծառայեցնելու, այլև Երևանում սկիզբ առած լայնածավալ կապիտալ ներդրումների, բարեփոխումների բնականոն ընթացքն ապահովելու համար:
Սա կարևոր է նաև մեր պետականության շուրջ համախմբվելու, Երևանը արտաքին աշխարհից թելադրվող անկայունության թատերաբեմ չդարձնելու տեսակետից»։
