Մեկնարկում է «Երևանը կանանց համար» դրամաշնորհային ծրագիրը. հայտնում են քաղաքապետարանից։
Նախաձեռնության գլխավոր նպատակը Երևանում ապրող և ստեղծագործող կանանց ոգեշնչելն է՝ տարածելով և արժևորելով նրանց կողմից ստեղծված մշակութային արժեքները։
Ծրագրի ընդհանուր բյուջեն կազմում է 30 մլն ՀՀ դրամ:
Ծրագիրը կիրականացվի հետևյալ ուղղություններով՝
Արվեստի կրթություն.
Այս ծրագրին կարող են դիմել 2023-2024 ուսումնական տարում արվեստի և մշակույթի ոլորտի մասնագիտություններով ՀՀ կամ արտասահմանյան բուհեր մագիստրոսական ծրագրով ընդունված, ՀՀ քաղաքացի հանդիսացող, իգական սեռի այն ուսանողները, որոնք ընդունվել են բուհ գերազանց (95% և բարձր) գնահատականներով (20 բալանոց համակարգի պարագայում՝ 19 միավոր և ավելի, 4 բալանոց համակարգի պարագայում՝ 3.8 և ավելի, այլ գնահատման համակարգի դեպքում՝ գործում է սույն համամասնության սկզբունքը):
Դիմելու վերջնաժամկետը հոկտեմբերի 30-ը, ժամը 24:00-ն է։
Գրականություն
Ծրագրին կարող են դիմել արձակ ոճում հրապարակված/հրատարակված ստեղծագործության հեղինակ, ՀՀ քաղաքացի հանդիսացող կին գրողները, որոնք մինչև 2025 թվականը պետք է ներկայացնեն հայ անվանի կնոջ/կանանց մասին արձակ ստեղծագործություն (վեպ):
Դիմելու վերջնաժամկետն է նոյեմբերի 15-ը, ժամը 24։00-ն։
Գեղարվեստ
Ծրագրին կարող են դիմել ՀՀ ռեզիդենտ համարվող այն անհատները/կազմակերպությունները, որոնք մինչև 2024 թվականը Երևանի ցուցասրահներից մեկում կիրականացնեն կին արվեստագետի/արվեստագետների կերպարվեստի (գեղանկարչություն, քանդակ, դեկորատիվ-կիրառական արվեստ) աշխատանքների առնվազն 10-օրյա ցուցադրություն:
Դիմելու վերջնաժամկետն է հոկտեմբերի 30-ը, ժամը 24:00-ն։
Քանդակագործություն
Ծրագրին կարող են դիմել ՀՀ քաղաքացիություն ունեցող կին քանդակագործները, որոնք կներկայացնեն քաղաքային քանդակի ոճով իրականացված աշխատանք՝ էսքիզային տարբերակով և մանրակերտով: Ընտրական փուլի արդյունքների ամփոփումից և հաղթող ճանաչվելուց հետո, հատկացված դրամաշնորհի շրջանակում, 2024 թվականի ընթացքում պետք է իրականացվեն քանդակի պատրաստման և տեղադրման աշխատանքները:
Դիմելու վերջնաժամկետն է նոյեմբերի 15-ը, ժամը 24:00-ն։
Թատերարվեստ
Ծրագրին կարող են դիմել ՀՀ ռեզիդենտ համարվող այն անհատները/կազմակերպությունները, որոնք կներկայացնեն ժամանակակից կին թատերագրի պիես, որի բովանդակությունը կվերաբերի կանանց հիմնախնդիրների գեղարվեստական արծարծմանը: Ընտրական փուլի արդյունքների ամփոփումից և հաղթող ճանաչվելուց հետո, հատկացված դրամաշնորհի շրջանակում, 2024 թվականի ընթացքում պետք է իրականացվի պիեսի բեմադրությունը Երևան քաղաքում գործող թատերական կազմակերպություններից մեկում:
Դիմելու վերջնաժամկետն է նոյեմբերի 15-ը, ժամը 24:00-ն։
Երաժշտարվեստ
Ծրագրին կարող են դիմել ՀՀ քաղաքացիություն ունեցող կին կոմպոզիտորները, որոնք կներկայացնեն կամերային ժանրի ստեղծագործություն (գործիքային, վոկալ, վոկալ-գործիքային): Ընտրական փուլի արդյունքների ամփոփումից և հաղթող ճանաչվելուց հետո, հատկացված դրամաշնորհի շրջանակում, մինչև 2024 թվականը պետք է իրականացվի ստեղծագործության առաջին կատարումը Երևան քաղաքում գործող, առնվազն 300 ունկնդրի համար նախատեսված դահլիճներից մեկում:
Դիմելու վերջնաժամկետն է հոկտեմբերի 30-ը, ժամը 24:00-ն։
Մանրամասներն այստեղ։
