Երևան
Տիգրան Ավինյանը կոյուղու վնասման առնչությամբ հանձնարարականներ տվեց (ՏԵՍԱՆՅՈՒԹ)
Երևանի փոխքաղաքապետ Տիգրան Ավինյանը հերթական գործակարգավարական խորհրդակցությունը սկսեց քննարկմամբ, թե ինչպես անել, որ անթերի համակարգվի ասֆալտապատման գործընթացը․
«Հիմա Մուրացանում միջին նորոգման աշխատանք է արած, պարզվում է, որ կոյուղու լուրջ խնդիր կա, և նորից պետք է փորել»,- նշեց Ավինյանը։
Ըստ Կամո Արեյանի՝ երբեմն տեխնածին աղետները անխուսափելի են, և Մուրացանի դեպքը դրա վկայությունն էր, քանի որ կոյուղու վթարը ի հայտ է եկել ասֆալտապատումից հետո․
«Այլ բան, որ նախապես ուսումնասիրվի վիճակը, ակտավորվի, և ըստ այդմ էլ համաձայնեցվի՝ որը որից առաջ արվի»,- նշեց Կամո Արեյանը։
Տիգրան Ավինյանը հետաքրքրվեց՝ արդյո՞ք կա խնդիր, որ, օրինակ, «Վեոլիան» տեղեկություն չունի ընդհանուր ցանցի վիճակի մասին․
«Կոյուղագծի վրա կառուցապատում է իրականացվել տարիների ընթացքում։ Կոյուղագիծը լվացվել, մաքրվել է և գտնվել է աշխատանքային վիճակում։ Ասֆալտապատման աշխատանքներից հետո, հավանաբար, դիտահորի փլուզում է տեղի ունեցել, ու խցանումը հնարավոր չի լինում բացել»,- ավելացրեց «Վեոլիա ջրի» ներկայացուցիչը։
