Երևան
«Այնպես անենք, որ մյուս տարվանից սկսենք շինարարությունը». Տիգրան Ավինյանը՝ Ազարյանի անվան մարզադպրոցի մասին
Երևանի կառուցապատման ներդրումային ծրագրերի իրականացման ՀՈԱԿ-ի տնօրեն Շողիկ Երանյանը գործակարգավարական նիստում տեղեկացրեց, որ պետգույքի կառավարման կոմիտեի և «Հրազդան» մարզահամալիրի միջև կնքվել է անշարժ գույքի նվիրատվության պայմանագիր, որով Հրազդանի կիրճում 15․509 մ² հողատարածք է նվիրաբերվել կոմիտեին։ Այնուհետ, 2 ամսվա ընթացքում պետգույքի կառավարման կոմիտեի և Երևան քաղաքի միջև կկնքվի նվիրատվության պայմանագիր՝ տարածքում Ալբերտ Ազարյանի անվան նոր մարզաբազա կառուցելու նպատակով։
«Նախագծանախահաշվային աշխատանքների կատարման ֆինանսավորման հայտ էր ներկայացվել, որը հաստատվել է»,- հայտնեց Երանյանը։
Տիգրան Ավինյանը հետաքրքրվեց՝ կարո՞ղ են պլանավորել այս տարի ունենալ նախագիծ և հաջորդ տարվանից սկսել կառուցել մարզադպրոցը։ Ըստ Երանյանի՝ պետք է փորձել․ «Ամեն ինչ կախված է գնման գործընթացից, թե ինչ արագությամբ այն կլինի»։
Ավինյանն էլ հրահանգեց․ «Եկեք այնպես անենք, որ այս տարի նախագիծը լինի, իսկ մյուս տարվանից սկսենք շինարարությունը։ Եկեք՝ չփորձենք, այլ անենք, տիկին Երանյան»։
