Թատրոնի համաշխարհային օրվան ընդառաջ Երևանի քաղաքապետարանն այս տարի հանդես եկավ նոր նախաձեռնությամբ՝ առաջին անգամ իրականացվեց «Թատերական Երևան» խորագրով դրամաշնորհային մրցույթ: Նախագիծն այս նպատակ ունի աշխուժացնել մշակութային կյանքը, խրախուսել թատերական նոր նախաձեռնություններն ու նոր բեմադրություններով համալրել թատրոնների խաղացանկերը: Երևանի փոխքաղաքապետ Տիգրան Ավինյանը հյուրընկալել է դրամաշնորհային մրցույթի հաղթողներին: 

«Որոշակի նոր մշակույթ է ձևավորվում, և մենք ցանկանում ենք այս նախաձեռնությունը դարձնել ամենամյա: Այս տարի մենք ունենալու ենք նաև նոր փորձարարություն՝ Թատրոնի միջազգային փառատոն կազմակերպելու առումով, սեպտեմբերին նման նախաձեռնություն է պլանավորվում իրականացնել: Առհասարակ թատերական կյանքին վերաբերող բոլոր հարցերում քաղաքապետարանը պատրաստ է նոր մոտեցումներ ցուցաբերել: Մենք նաև թատրոններում իրականացնում ենք ենթակառուցվածքների էական բարեփոխումներ»,- նշել է Տիգրան Ավինյանը: 

Դրամաշնորհին, ի դեպ, մասնակցության հնարավորություն ունեին նաև մարզերում գործող թատրոնները, կազմակերպություններն ու թատերական նախաձեռնությունները: Ստացված 23 թատերական բեմադրության հայտերից, հաշվի առնելով ներկայացված գնահատման չափորոշիչները, ընտրվել է 9 հայտ, որոնք կֆինանսավորվեն Երևանի քաղաքապետարանի կողմից:  Դրամաշնորհային ծրագրին ընդհանուր առմամբ կհատկացվի շուրջ 50 մլն ՀՀ դրամ: 

«Լինելով մայրաքաղաք և ռեսուրսների բավարար չափով տիրապետող կենտրոն՝ շատ սխալ կլինի, եթե մենք մարզային թատրոններին աջակցություն չցուցաբերենք: Նշեմ, որ բոլորի համար մրցույթը բաց է եղել: Կարծում եմ՝ Երևանը առաջնորդելու և աջակցելու հանձնառություն ունի առաջնորդել, և դա ճիշտ սկզբունք է, որ մենք ի սկզբանե որդեգրել ենք»,- ընդգծել է փոխքաղաքապետ Ավինյանը:  

Դրամաշնորհային մրցույթի արդյունքներով ընտրված թատերական նախագծերն են. 

1.    «Արվեստը»-ներկայացնող՝ «Բարեկամ» մշակույթի, արվեստի և սպորտի զարգացման կենտրոն ՀԿ
2.    «ԱՈՒԹ»-ներկայացնող՝ Անուշ Խերունց
3.    «Երկաթյա դասակարգ»- ներկայացնող՝ Արա Գևորգյան
4.    «Երկարագուլպա Պեպպին»-ներկայացնող՝ «Երևանի Հ. Ղափլանյանի անվան դրամատիկական թատրոն» ՀՈԱԿ
5.    «Մեր քաղաքի կանոնները»-ներկայացնող՝ «Երևանի Հ. Թումանյանի անվան պետական տիկնիկային թատրոն» ՊՈԱԿ
6.    «Շան սիրտը»- ներկայացնող՝ «Ս. Սարգսյանի անվան համազգային թատրոն» ՊՈԱԿ
7.    «Վիրուս»- ներկայացնող՝ «Դոփապարի հայկական ֆեդերացիա» ՀԿ
8.    «Ուշացածը»- ներկայացնող՝ «Թեք տեղ» ՀԿ
9.    «Ոստրեն և մարգարիտը»- ներկայացնող՝ «Վանաձորի Հ. Աբելյանի անվան պետական դրամատիկական թատրոն»: