Երևան
Երևանի քաղաքապետարանը լարված աշխատում է. Կամո Արեյանը՝ մայրաքաղաքի ձյանմաքրման աշխատանքների մասին
Երևանի քաղաքապետի խորհրդական Կամո Արեյանը գործակարգավարական նիստին անդրադարձել է այս գիշեր մայրաքաղաքում ձյան տեղումներին։
Նա տեղեկացրել է, որ փետրվարի 5-ին տեղումները Երևանում դադարել են ժամը 12.30-ի սահմաններում, մինչ այդ անձնակազմն աշխատել է. «Լույս 6-ի գիշերը ևս աշխատել ենք, որևէ խնդիր չի առաջացել։ Ամենամեծ լարվածությունը եղել է այս գիշեր ժամը 4-ին»,- տեղեկացրել է Արեյանը՝ հավելելով, որ մայրաքաղաքի բոլոր փողոցները բաց են։
Նա նաև նշել է, որ լարվածությունը շարունակվելու է մինչև փետրվարի 10-ը։ Ըստ Արեյանի՝ ԵԱՍՄ համայնքային հիմնարկը զբաղված է աղի նոր խմբաքանակի ներկրմամբ. «Լրացուցիչ քանակությամբ աղ է բերվում, հիմա խառնուրդի մեջ աղի չափաբաժինն ավելի շատ է, քան կարմիր ավազինը։ Դա մինչև -7-ը մեզ բավարար է, որից հետո ըստ անհրաժեշտության կկիրառենք կարմիր ավազ»։
Արեյանը նշել է, որ ողջ օղակը լարված աշխատում է, և չկա մի օղակ, որ ցուցաբերի անտարբերություն կամ անզգոնություն։
