Երևանի ավագանին այսօր կայացած նիստում հաստատեց 2023թ․ տարեկան բյուջեն։ Այս մասին հայտնում է Երևանի քաղաքապետի առաջին տեղակալ Լևոն Հովհաննիսյանը։
«Հաջորդ տարի եկամուտների գծով նախատեսված է 105,103,316.6 հազ. դրամ, ծախսերի գծով՝ 105,535,919.3 հազ. դրամ։
Ուզում եմ առանձնացնել մի շարք խոշոր ու նշանակալից ծախսային ծրագրեր, որոնք նախատեսում ենք իրականացնել․
Կհիմնանորոգվի թվով 24 մանկապարտեզ, թվով 6 մանկապարտեզի բակ, ինչպես նաև ավարտին կհասցվի դեռևս 2022 թվականին մեկնարկած թվով 9 մանկապարտեզի հիմնանորոգումը։
Կապիտալ հիմնանորոգում կիրականացվի թվով 69 բակերում, կվերակառուցվի թվով 17 ֆուտբոլի դաշտ, բակային տարածքներում կտեղադրվեն խաղասարքեր, նստարաններ, զրուցարաններ, ինչպես նաև Երևանի բոլոր վարչական շրջաններում կիրականացվեն բակային տարածքների ընթացիկ նորոգման և պահպանման աշխատանքներ։
Վերելակների շարունակական հիմնանորոգումը, որի արդյունքում մայրաքաղաքի շենքերում կփոխարինվի 100, իսկ հետագա հիմնանորոգման նպատակով տարվա ընթացքում ձեռք կբերվի ևս 600 վերելակ:
Առաջնային բուժօգնությունը բարելավելու նպատակով կհիմնանորոգվի թվով 2 պոլիկլինիկա:
Նախատեսվում է հիմնանորոգել թվով 14 հանգստի գոտի, ինչպես նաև կատարել ընթացիկ բնույթի նորոգման աշխատանքներ Երևան համայնքի տարբեր այգիներում։
Համայնքային ենթակայության տակ գտնվող նախադպրոցական և արտադպրոցական հաստատություններում աշխատավարձի ֆոնդը նախատեսվում է բարձրացնել շուրջ 11.48%-ով։
Ջրահեռացման և կոմունիկացիոն ցանցերի կառուցման գծով նախատեսվում է վերակառուցել թվով 7 տարածքում ջրահեռացման կոյուղագծերը:
Շարունակվելու են ոռոգման ցանցի կառուցման և վերանորոգման ծրագրերը:
Տրանսպորտային համակարգի արդիականացում ծրագրով նախատեսված է իրականացնել Երևան քաղաքի Մալաթիա-Սեբաստիա վարչական շրջանի Լենինգրադյան փողոցի հ.16 հասցեի վարչական շենքի կառավարման կենտրոնի կառուցման աշխատանքները:
Ասիական զարգացման բանկի աջակցությամբ կմեկնարկեն Իսակով-Արշակունյաց նոր ճանապարհահատվածի կառուցման աշխատանքները:
Բնապահպանական կայանների կառուցման ծրագրով Գետառ գետի վրա (Հրազդան գետի թափվելու վայրում) կկառուցվի մաքրման կայան:
Բազմաբնակարան շենքերի մուտքերի վերանորոգման ծրագրով կիրականացվեն թվով շուրջ 200 բազմաբնակարան շենքերի մուտքերի վերանորոգման աշխատանքեր։
Բազմաբնակարան շենքերի հարթ տանիքների վերանորոգում և բազմաբնակարան շենքերի թեք տանիքների վերանորոգում ծրագրերի շրջանակում կկատարվեն շուրջ 69000 քմ հարթ և շուրջ 50 բազմաբնակարան շենքների թեք տանիքների հիմնանորոգման աշխատանքներ:
Շուրջ 40,000.0 հազ. դրամ կհատկացվի գրադարանների վերազինման, մասնավորապես՝ նոր թողարկված, արդի և ժամանակակից գրականության ձեռքբերման նպատակով։
Սոցիալական ծրագրերի իրականացման նպատակով էլ նախատեսված է 512,261.9 հազ. դրամ:
