Միջազգային
Թեհրանի դիահերձարանից տեսանյութերը վկայում են Իրանում բողոքների ծայրահեղ դաժան ճնշման մասին. BBC
Համացանցում Թեհրանի դիահերձարանից շոկային նոր տեսանյութեր են տարածվել, որոնցում երևում են երկար շարքերով ծածկված մարմիններ, արյունոտ հատակներ և բազմաթիվ մարդիկ, որոնք փնտրում են իրենց հարազատների դիակները։
Սրանք Իրանի իշխանությունների կողմից բողոքի ցույցերի ծայրահեղ դաժան ճնշման հետևանքներն են։
BBC Verify փաստերի ստուգման ծառայությունը և BBC-ի պարսկերեն ծառայությունը վերլուծել և հաստատել են այդ տեսանյութերի իսկությունը, սակայն չեն հրապարակում դրանք՝ հաշվի առնելով դրանցում առկա ծայրահեղ դաժան և արյունոտ կադրերը։ Այս տեսագրությունները ցույց են տալիս, թե որքան դաժանորեն են իշխանությունները ճնշում դեկտեմբերի 28-ից սկսված բողոքները, որոնք սկզբում բռնկվել են Թեհրանում, իսկ հետո տարածվել են ողջ երկրով մեկ։
Շատ մարմինների վրա երևում են վնասվածքներ։ Շատ պարկերի վրա նշված են ծննդյան ամսաթվեր, և զոհերից մեկը ընդամենը 16 տարեկան է եղել։
Բողոքների ընթացքում զոհվածների ընդհանուր թիվը հայտնի չէ։ ԱՄՆ-ում գործող Human Rights Activists News Agency (HRANA) իրավապաշտպան կազմակերպությունը գնահատում է զոհերի թիվը ավելի քան 2500 մարդու։ Այս շաբաթ Իրանի մեկ պաշտոնյա Reuters գործակալությանը հայտնել է, որ զոհվել է մոտ 2000 մարդ, միաժամանակ նրանց մահը մեղադրելով «ահաբեկիչներին»։
