Իրանում իրավիճակը կտրուկ սրվում է. շարունակվող բողոքի ցույցերը վերածվում են բախումների, ինչի հետևանքով ԱՄՆ պետդեպարտամենտը հանդես է եկել հրատապ հայտարարությամբ՝ կոչ անելով իր քաղաքացիներին անհապաղ լքել երկիրը։ Իշխանությունների կողմից իրականացվող անվտանգության խստացված միջոցառումների պատճառով երկրում սահմանափակվել է ինտերնետ կապն ու հեռախոսակապը, իսկ ավիաընկերությունները մինչև հունվարի 16-ը չեղարկել կամ սահմանափակել են թռիչքները դեպի Իրան և հակառակ ուղղությամբ։
Ստեղծված ճգնաժամային պայմաններում որպես հիմնական և ապահով ելքի ուղի դիտարկվում է Հայաստանը։ Հունվարի 12-ի դրությամբ Ագարակ-Նորդուզ ցամաքային սահմանային անցակետը շարունակում է բաց մնալ։ ԱՄՆ քաղաքացիները կարող են մուտք գործել Հայաստան վավեր անձնագրով և մնալ երկրի տարածքում մինչև 180 օր՝ առանց վիզայի ձևակերպման անհրաժեշտության։ Երևանում ԱՄՆ դեսպանատունը պատրաստակամություն է հայտնել աջակցել իր քաղաքացիներին և հորդորել է սահմանը հատելուց առաջ անհրաժեշտ տվյալներն ուղարկել համապատասխան էլեկտրոնային հասցեին։
Հայտարարության մեջ ասվում է, որ բացի Հայաստանից, բաց են մնում նաև Թուրքիայի հետ սահմանային անցակետերը, սակայն Ադրբեջանի և Թուրքմենստանի ուղղությամբ գործում են լուրջ սահմանափակումներ կամ հատուկ թույլտվության պահանջներ։ ԱՄՆ քաղաքացիներին, հատկապես երկքաղաքացիություն ունեցողներին, զգուշացվում է, որ Իրանը չի ճանաչում երկքաղաքացիությունը, ինչը զգալիորեն մեծացնում է ձերբակալության և կալանավորման ռիսկը։ Նրանց խորհուրդ է տրվում ցուցաբերել ծայրահեղ զգոնություն, խուսափել մարդաշատ վայրերից և ունենալ առաջին անհրաժեշտության պարագաների պաշարներ, եթե երկիրը լքելն այս պահին անհնար է։
