ԱՄՆ նախագահ Դոնալդ Թրամփը հայտարարել է, որ Թեհրանն առաջարկել է բանակցություններ սկսել այն բանից հետո, երբ ինքը սպառնացել է հարվածներ հասցնել Իրանին։
Թրամփի խոսքով, ինքը սպառնալիքը հնչեցրել է Իրանում բողոքի ցույցերի մասնակիցների դեմ արյունալի ճնշումների ֆոնին. բողոքի ցույցերի ժամանակ զոհերի թիվը հասել է առնվազն 544-ի։
Associated press-ը գրում է, որ Թրամփը և ազգային անվտանգության հարցերով զբաղվող նրա թիմը քննարկել են Իրանի դեմ հնարավոր պատասխան գործողությունների մի շարք տարբերակներ, այդ թվում՝ կիբերհարձակումներ և ԱՄՆ-ի կամ Իսրայելի կողմից ուղղակի հարվածներ։
Մինչ այդ, Թրամփը հայտնել է. «Զինվորականները քննարկում են այս հարցը, և մենք դիտարկում ենք մի քանի շատ արդյունավետ տարբերակներ»։
Իրանի կողմից հնարավոր պատասխան գործողությունների վերաբերյալ հարցին ի պատասխան՝ նա ավելացրել է. «Եթե նրանք դա անեն, մենք կհարվածենք նրանց այնպիսի մասշտաբով, ինչպես նրանք երբևէ չեն ստացել»։
Թրամփը նշել է, որ իր վարչակազմը բանակցություններ է վարում Թեհրանի հետ հանդիպում կազմակերպելու շուրջ, սակայն զգուշացրել է, որ գուցե ստիպված լինի գործել առաջինը, քանի որ Իրանում զոհերի թիվը շարունակում է աճել, իսկ կառավարությունը շարունակում է ձերբակալել բողոքի մասնակիցներին։
«Իրանի ղեկավարները երեկ զանգահարել են՝ բանակցելու համար: Նրանք ցանկանում են բանակցել»,- ասել է նա։
