Իրանում արդեն տասներորդ օրն ընթացող բողոքի զանգվածային ցույցերը հասել են վտանգավոր հանգրվանի։
Երկրի արևմտյան հատվածում՝ Իլամ նահանգում, ցուցարարներին հաջողվել է վերահսկողություն հաստատել Աբդանան և Մալեքշահի քաղաքների մի շարք հատվածների վրա՝ դուրս մղելով կառավարական ուժերին։
Սա տեղի է ունենում այն բանից հետո, երբ բողոքի ակցիաները, որոնք սկսվել էին տնտեսական ճգնաժամի և ազգային արժույթի փլուզման պատճառով, վերածվեցին համազգային ընդվզման՝ ուղղված երկրի հոգևոր առաջնորդության դեմ։
Fox news-ը գրում է, որ իրադարձությունների կենտրոնում է հայտնվել նաև ԱՄՆ նախագահ Դոնալդ Թրամփը, որին ցուցարարները բացահայտորեն օգնության կոչ են անում։ Սոցիալական ցանցերում տարածվող տեսանյութերում երևում են կանայք և երիտասարդներ, որոնք ձեռքում պահում են անգլերեն գրություններով պաստառներ՝ «Թրամփը խաղաղության խորհրդանիշ է» և «Թույլ մի տվեք մեզ սպանել» մակագրություններով։ Որոշ քաղաքներում ցուցարարները նույնիսկ փողոցները խորհրդանշական կերպով անվանակոչում են Թրամփի անունով՝ հույս հայտնելով, որ Վաշինգտոնի կոշտ դիրքորոշումը կզսպի Թեհրանի բռնաճնշումները։
Իրանի ներսում իրավիճակը շարունակում է մնալ ծայրահեղ լարված։ Հաղորդվում է, որ ուժայինները կրակ են բացել հիվանդանոցների ուղղությամբ, որտեղ ապաստան էին գտել վիրավոր ցուցարարները, մասնավորապես՝ Իլամի Իմամ Խոմեյնիի անվան հիվանդանոցում։
Իրանի բարձրագույն ղեկավարությունը ԱՄՆ-ի և Իսրայելի գործողությունները որակել է որպես միջամտություն ներքին գործերին և հայտարարել, որ ցանկացած օտարերկրյա միջամտություն կհամարվի «կարմիր գծի» հատում։
