Միջազգային
Ուկրաինայում բրիտանական և ֆրանսիական զորքերի տեղակայումը պարտադիր է. Զելենսկի
Ուկրաինայի անվտանգության երաշխիքները պետք է ներառեն երկրում եվրոպական՝ առնվազն բրիտանական և ֆրանսիական զորքերի տեղակայում։ Այս մասին հայտարարել է Ուկրաինայի նախագահ Վլադիմիր Զելենսկին հունվարի 3-ին Կիևում կայացած ճեպազրույցի ժամանակ։
«Բրիտանիան և Ֆրանսիան նախագահում են «կամավորների կոալիցիայում»։ Նրանց ռազմական ներկայությունը պարտադիր է», - Զելենսկիի խոսքերն է մեջբերում «Եվրոպական պրավդա» հրատարակությունը։ Նա հավելել է, որ կոալիցիայի մյուս անդամները նույնպես կարող են զորքեր ուղարկել Ուկրաինա, չնայած նրանք պարտավոր չեն դա անել։
Հունվարի 3-ին Ուկրաինայի առաջնորդը Կիևում հանդիպել է Գերմանիայի, Միացյալ Թագավորության, Ֆրանսիայի, Իտալիայի, Իսպանիայի, Լատվիայի, Էստոնիայի, Լիտվայի, Լեհաստանի, Ֆինլանդիայի, Կանադայի, Նիդեռլանդների, Շվեդիայի, Նորվեգիայի և Դանիայի պետությունների և կառավարությունների ղեկավարների ազգային անվտանգության խորհրդականների, ինչպես նաև ՆԱՏՕ-ի, Եվրոպական խորհրդի և Եվրոպական հանձնաժողովի ներկայացուցիչների հետ։
Դեկտեմբերի 31-ին Die Welt թերթը, հղում անելով եվրոպական դիվանագիտական շրջանակների աղբյուրներին, հաղորդել է, որ Ֆրանսիան և Միացյալ Թագավորությունը պատրաստ են իրենց զորքերը ուղարկել Ուկրաինա՝ ապագա խաղաղությունն ապահովելու համար։ Թերթի տվյալներով՝ Փարիզն ու Լոնդոնը պատրաստ են դա անել նույնիսկ առանց ՄԱԿ-ի կամ ԵՄ մանդատի։
