Իրանի մայրաքաղաք Թեհրանում արդեն երկրորդ օրն է՝ շարունակվում են բողոքի ակցիաները, որոնք պայմանավորված են ազգային արժույթի կտրուկ թուլացմամբ և գների աճով: Մասնակիցների հիմնական մասը կազմում են առևտրի ոլորտի ներկայացուցիչները։ Քաղաքի մի շարք շրջաններում, այդ թվում՝ շուկաներում և առևտրային փողոցներում, ժամանակավորապես դադարեցվել է խանութների աշխատանքը, հաղորդում են իրանական ԶԼՄ-ները։
Դժգոհության առիթ է դարձել ռիալի փոխարժեքի էական անկումը ԱՄՆ դոլարի նկատմամբ։ Դեկտեմբերի 28-ի տվյալներով՝ փոխարժեքը հասել է մեկ դոլարի դիմաց մոտ 1,445,000 ռիալ նշագծին։ Արժութային տատանումների ֆոնին պահպանվում է բարձր գնաճը. պաշտոնական վիճակագրության համաձայն՝ տարեսկզբից այն գերազանցել է 50 տոկոսը, իսկ սննդամթերքի գները զգալիորեն աճել են:
Իշխանությունները հայտարարում են արժութային շուկայում իրավիճակի կայունացման համար միջոցներ ձեռնարկելու մտադրության մասին և նախազգուշացնում են սպեկուլյատիվ գործողությունների համար իրավական պատասխանատվության մասին: Միևնույն ժամանակ, պետական լրատվամիջոցներն ընդգծում են, որ տնտեսական դժվարությունները խորանում են արտաքին գործոններով և պատժամիջոցային ճնշումներով:
Ավելի վաղ կառավարությունը խորհրդարան էր ներկայացրել նոր տարվա բյուջեի նախագիծը, որով նախատեսվում է հարկային մուտքերի ավելացում: Երկրի նախագահը խոստովանել է, որ բնակչության համար գների աճը փոխհատուցելու պետության հնարավորությունները մնում են սահմանափակ:
Շուկաներում իրավիճակը շարունակում է լարված մնալ՝ չնայած վերջին օրերին փոխարժեքի աննշան տատանումներին։
