Միջազգային
ԱՄՆ-ն մտահոգություն է հայտնել Կամբոջայի և Թաիլանդի միջև շարունակվող բռնության վերաբերյալ
ԱՄՆ պետքարտուղար Մարկո Ռուբիոն Կամբոջայի վարչապետ Հուն Մանեթի հետ հեռախոսազրույցի ժամանակ հայտնել է Վաշինգտոնի պատրաստակամությունը՝ մասնակցելու Կամբոջայի և Թաիլանդի միջև խաղաղության բանակցություններին․ հայտարարել է Պետդեպարտամենտը ուրբաթ օրը։
«Ռուբիոն վերահաստատել է Միացյալ Նահանգների պատրաստակամությունը՝ նպաստելու Կամբոջայի և Թաիլանդի միջև խաղաղության և կայունության ապահովման բանակցություններին», - ասվում է հայտարարության մեջ։
Հայտարարության մեջ նշվում է, որ պետքարտուղարը մտահոգություն է հայտնել «շարունակվող բռնության» վերաբերյալ։ Պետքարտուղարը վերահաստատել է նախագահ Թրամփի հանձնառությունը խաղաղությանը և Մալայզիայում ստորագրված խաղաղության համաձայնագրի լիարժեք իրականացման անհրաժեշտությունը, հայտնել է ԱՄՆ Պետդեպարտամենտը։
Կամբոջայի վարչապետ Հուն Մանեթը իր սոցիալական ցանցերի էջում գրառման մեջ նշել է, որ Ռուբիոյի հետ զրույցում վերահաստատել է իր երկրի հանձնառությունը նախկինում ստորագրված խաղաղության համաձայնագրին։
Մանեթը ընդգծել է, որ Կամբոջան «շարունակում է հավատարիմ մնալ սահմանային հարցի խաղաղ լուծման դիրքորոշմանը» և հույս է հայտնել, որ Կամբոջան և Թաիլանդը կաշխատեն համատեղ՝ համաձայն գործող համաձայնագրերի և կհասնեն երկարատև խաղաղության։
