Միջազգային
Հատուկ գործողություն Վենեսուելայի ափերի մոտ. ԱՄՆ-ը նավթային տանկեր է առգրավվել
ԱՄՆ նախագահ Դոնալդ Թրամփը տեղեկացրել է, որ ամերիկյան իշխանությունները Վենեսուելայի ափերի մոտ առգրավել են «շատ մեծ» նավթատար տանկեր։
«Լրատվական առումով հետաքրքիր օր էր: Ինչպես հավանաբար տեղյակ եք, մենք հենց նոր առգրավեցինք մի տանկեր Վենեսուելայի ափերի մոտ՝ մեծ տանկեր, շատ մեծ, ամենամեծերից մեկը, որ երբևէ առգրավվել է: Այլ բաներ էլ են տեղի ունենում, հետո կտեսնեք և կխոսեք դրա մասին», – լրագրողներին ասել է Թրամփը:
Մի փոքր ուշ նա հավելել է. «Առգրավումը կատարվել է շատ լուրջ հիմքերով»՝ առանց մանրամասներ ներկայացնելու, և խոստացել է շուտով հրապարակել լուսանկարներ:
Թրամփի հայտարարությունից անմիջապես հետո ԱՄՆ գլխավոր դատախազ Փեմ Բոնդին սոցիալական ցանցերում լրացուցիչ տեղեկություններ է հրապարակել.
Նա հայտնել է, որ տանկերը տարիներ շարունակ գտնվում է ԱՄՆ պատժամիջոցների տակ՝ «օտարերկրյա ահաբեկչական կազմակերպություններին աջակցող ապօրինի նավթափոխադրման ցանցին մասնակցելու» պատճառով:
Ըստ Բոնդիի՝ առգրավել են Վենեսուելայից և Իրանից պատժամիջոցների տակ գտնվող նավթ տեղափոխող տանկերը:
«Տանկերի առգրավումը Վենեսուելայի ափերի մոտ անցել է անվտանգ և հաջող», – ընդգծել է գլխավոր դատախազը՝ հավելելով, որ «պատժամիջոցային նավթի փոխադրման» գործով հետաքննությունը շարունակվում է:
