Իսրայելի վարչապետ Բենիամին Նեթանյահուն հայտարարել է, որ իր դեմ դատական հետապնդումների դադարեցումը բխում է երկրի ազգային շահերից և կօգնի կանխել հասարակության հետագա պառակտումները։ Ավելի վաղ Իսրայելի նախագահ Իսահակ Հերցոգի գրասենյակը հայտարարել էր, որ վարչապետ Նեթանյահուն ներկայացրել է ներման պաշտոնական խնդրանք՝ իր դեմ ընթացող դատական հետապնդումների ֆոնին։
«Իմ անձնական շահագրգռվածությունը եղել և մնում է դատավարությունը մինչև իր ավարտը՝ բոլոր մեղադրանքներով լիակատար արդարացում։ Սակայն անվտանգության և արտաքին քաղաքականության, ինչպես նաև ազգային շահերի իրականությունը պահանջում է այլ բան։ Իսրայել պետությունը բախվում է հսկայական մարտահրավերների, և միևնույն ժամանակ՝ հսկայական հնարավորությունների։ Այս սպառնալիքներին արձագանքելը և այդ հնարավորությունների իրականացումը պահանջում է ազգային միասնություն», - ասել է Նեթանյահուն տեսաուղերձում։
Նեթանյահուի խոսքով՝ քրեական հետապնդման շարունակությունը ներսից պառակտում է հասարակությունը՝ խորացնելով անհամաձայնությունը։ «Դատավարության անհապաղ ավարտը զգալիորեն կնպաստի լարվածության նվազեցմանը և մեր երկրին այդքան հուսահատորեն անհրաժեշտ լայն հաշտեցմանը... Այս պատճառներով իմ փաստաբաններն այսօր ներման խնդրանք են ներկայացրել նախագահին։ Ես ակնկալում եմ, որ բոլոր նրանք, ովքեր առաջնահերթություն են տալիս պետության բարօրությանը, կաջակցեն այս քայլին», - եզրափակել է Նեթանյահուն։
