ԱՄՆ նախագահ Դոնալդ Թրամփի վարչակազմը Ուկրաինային է ներկայացրել խաղաղության նոր ծրագիր, որի համաձայն՝ Կիևը կստանա աննախադեպ անվտանգային երաշխիքներ՝ մոդելավորված ՆԱՏՕ-ի հոդված 5-ի սկզբունքով: Այդ մասին հաղորդում է Axios-ը՝ հղում անելով իր տրամադրության տակ հայտնված փաստաթղթերին:
Ինչ է առաջարկում Թրամփը
Փաստաթղթում ամրագրվում է. եթե Ռուսաստանը կրկին «զգալի, կանխամտածված և շարունակական զինված հարձակում» գործի Ուկրաինայի վրա՝ խախտելով համաձայնեցված զինադադարի գիծը, դա կդիտարկվի որպես «տրանսատլանտյան համայնքի խաղաղության և անվտանգության սպառնալիք»: Այդ դեպքում ԱՄՆ-ն և եվրոպական դաշնակիցները կպարտավորվեն համապատասխան արձագանքել՝ ներառյալ ռազմական ուժի կիրառմամբ:
- Երաշխիքը տրվում է սկզբում 10 տարի ժամկետով, հետագայում կարող է երկարաձգվել կողմերի համաձայնությամբ:
- Փաստաթղթի վրա ստորագրելու տողեր նախատեսված են Ուկրաինայի, Ռուսաստանի, ԱՄՆ-ի, ԵՄ-ի և ՆԱՏՕ-ի համար:
- Սպիտակ տան բարձրաստիճան պաշտոնյան հաստատել է փաստաթղթի իսկությունը և նշել, որ Ռուսաստանին արդեն տեղեկացրել են դրա մասին, սակայն անհայտ է՝ Վլադիմիր Պուտինի ստորագրությունը վերջնականապես պարտադիր կլինի, թե ոչ:
Ինչու է սա կարևոր
Վոլոդիմիր Զելենսկու ամենակարևոր նպատակը խաղաղության բանակցություններում միշտ եղել է հենց ամուր անվտանգային երաշխիքներ ստանալը: Հիմա Կիևն առաջին անգամ ձեռքում ունի գրավոր առաջարկ, որը, ըստ Սպիտակ տան պաշտոնյաների, «մեծ հաղթանակ է Զելենսկու և Ուկրաինայի երկարաժամկետ անվտանգության համար»:
Հաղորդվում է, որ Թրամփի բանագնաց Սթիվ Ուիթքոֆֆը շաբաթվա վերջին քննարկել է առաջարկվող անվտանգության երաշխիքները Ուկրաինայի ազգային անվտանգության և պաշտպանության խորհրդի քարտուղար Ռուստեմ Ումերովի հետ, և փաստաթուղթը հինգշաբթի օրը գրավոր հանձնվել է Զելենսկուն։
