Իրանի նախագահ Մասուդ Փեզեշքիանը կարծում է, որ անհրաժեշտ է մայրաքաղաքը տեղափոխել Թեհրանից՝ գերբնակեցման և ջրի պակասի պատճառով, հինգշաբթի օրը հաղորդել է IRNA լրատվական գործակալությունը։
«Մենք այլընտրանք չունենք։ Սա անհրաժեշտություն է»,- հայտարարել է նա և բացատրել, որ եթե Թեհրանի բնակչությունը շարունակի աճել, անհնար կլինի ջրով ապահովել բոլոր բնակիչներին։
Իրանի նախագահն ընդգծել է, որ ջրի պակասը խնդիր է ոչ միայն Թեհրանի, այլև Իրանի մի քանի նահանգի համար։
Վերջին հինգ տարիների ընթացքում Իրանում տեղումների քանակը կայուն նվազել է։ Տեղական օդերևութաբանական ծառայությունների տվյալներով՝ այս տարի Թեհրանում տեղումների քանակը 40%-ով ցածր է նորմայից։
