Միջազգային
Շվեյցարիան «համոզեց» Թրամփին կրճատել մաքսատուրքերը՝ ազդելով նրա ճաշակի վրա․ Axios
Շվեյցարիան և ԱՄՆ-ն համաձայնության են եկել նախագահ Դոնալդ Թրամփի կողմից շվեյցարական ներմուծման վրա սահմանված 39% մաքսատուրքերը կրճատել մինչև 15%, որպես համաձայնագրի մի մաս, որը ներառում է Շվեյցարիայի կողմից ԱՄՆ-ում 200 միլիարդ դոլար (150 միլիարդ ֆունտ ստերլինգ) ներդնելու խոստում, հայտնում է BBC-ն։
«Դա մեծ թեթևացում է մեր տնտեսության համար», - ասել է Շվեյցարիայի էկոնոմիկայի նախարար Գի Պարմելենը։ Նա ասել է, որ անցյալ տարվա օգոստոսին լրացուցիչ մաքսատուրքերի ուժի մեջ մտնելուց ի վեր զգալի վնաս է հասցվել։
Պարմելենը նշել է, որ շվեյցարական բիզնես առաջնորդների կողմից անցյալ շաբաթ Սպիտակ տանը Թրամփի հետ հանդիպելու քայլը «վճռորոշ» է եղել համաձայնության հասնելու համար։
Գործարարներն այցելել են Օվալաձև աշխատասենյակ՝ իրենց հետ բերելով նվերներ, այդ թվում՝ Rolex ոսկե ժամացույց և շվեյցարական ոսկու վերամշակման MKS ընկերության հատուկ փորագրված ոսկե ձուլակտոր։
ԱՄՆ առևտրային ներկայացուցիչ Ջեյմիսոն Գրիրը հաստատել է, որ համաձայնության են եկել՝ ասելով, որ «նախագահ Թրամփի անզուգական գործարքները շարունակում են օգուտ բերել ամերիկյան ժողովրդին»։
Շվեյցարացի գործարարների դերը, կարծես, կարևոր է եղել, և որոշները, մասնավորապես շքեղ ապրանքների, ոսկու կամ ապրանքների առևտրով զբաղվողները, արդեն կապեր ունեին Թրամփի շրջապատում։
Axios-ն էլ գրել է, որ Շվեյցարիան «համոզեց» Թրամփին կրճատել մաքսատուրքերը՝ ուղղակիորեն ազդելով նրա ճաշակի վրա։ Պարբերականը նշել է, որ Շվեյցարիայի առաջատար գործարարների պատվիրակությունը ժամանել է Սպիտակ տուն՝ շքեղ նվերներով, այդ թվում՝ 130 հազար դոլար արժողությամբ անհատականացված ոսկե ձուլակտորով և Rolex սեղանի ժամացույցով, գումարած ամերիկյան ներդրումների խոստումներով։
«Թրամփը, որը հայտնի է ոսկու, շքեղության և բիզնես հսկաների գնահատմամբ, ջերմորեն ընդունել է այդ ժեստը։ Մի քանի օր անց ԱՄՆ-ն կրճատեց շվեյցարական ապրանքների մաքսատուրքերը 39%-ից մինչև 15%»,- նշել է պարբերականը։
