Միջազգային
ԴՆԹ անալիզը ցույց է տվել, որ գերմանական ընտանիքն այդտեղ ապրում է արդեն 3 հազար տարի
Գերմանիայի Ֆյորստե գյուղի բնակիչ Մանֆրեդ Հուխթհաուզենը միշտ իմացել է, որ իրենց ընտանիքը տարածքի հին բնակիչներից է։ Բայց երբ գիտնականները նրան ասել են ճշմարտությունը, նա պարզապես ապշել է։ Գերմանական Bild-ի փոխանցմամբ՝ պարզվել է, որ նրա նախնիները երեք հազար տարի առաջ ապրել են այստեղ՝ ընդամենը երկու կիլոմետր հեռավորության վրա։ Սա նշանակում է, որ առնվազն 120 սերունդ նրանք անընդհատ ապրել են այդ տարածքում։
Պատմությունը սկսվել է 1980 թվականին, երբ հնագետները Լիխտենշտեյնի քարայրում հայտնաբերել են 60 մարդու մոտ 4200 ոսկոր։ Դրանք փոքրիկ երեխաներից մինչև ծերեր են պատկանել, թաղված Քրիստոսից մոտավորապես հազար տարի առաջ։ Ոսկորների հետ միասին գտել են բրոնզե զարդեր, կերամիկական անոթներ, կենդանիների ոսկորներ և հագուստի մնացորդներ։
Բադ Գրունդեի թանգարանի տնօրեն Բրիգիտե Մորիցը բացատրել է, որ մահացածներին սկզբում թաղել են այլ վայրում, ապա տեղափոխել քարայր՝ որպես երկրորդային թաղում։ Սա համարվել է ճանապարհորդություն դեպի մյուս աշխարհ։ Քարայրում կրակների հետքերը ցույց են տալիս, որ այստեղ կատարվել են թաղման ծեսեր։
2007 թվականին Գյոտինգենի համալսարանի գիտնականները վերծանել են հնագույն ԴՆԹ-ն և առաջարկել են մոտակա գյուղի բնակիչներին հանձնել թքի նմուշներ։ Հուխթհաուզենը եղել է այն 120 կամավորներից մեկը։ Ինը ամիս անց նա նամակ է ստացել, որտեղ հավաստվել է, որ նա եղել է բնիկների սերունդներից։
«Դուք այն մարդկանցից եք, ովքեր քարայրից են»,- ասվել է նամակում, որը նրան շփոթության մեջ է գցել։
Այդ մարդկանց ոսկորներին ծանր աշխատանքի կամ բռնության հետքեր չեն եղել։ Հավանաբար նրանք աղի վաճառականներ են եղել. աղը ստացել են աղաջրից՝ այն գլինե անոթներում քացախով զտելով։ Հարցի լեռները այդ գործի համար իդեալական են եղել։ ԴՆԹ-ի վերլուծությունը ցույց է տվել նաև նրանց արտաքին տեսքը՝ հասակը, աչքերի և մազերի գույնը նման են տարածաշրջանի ժամանակակից բնակիչներին։
Հուխթհաուզենն ունի երկու որդի, մեկը մնացել է գյուղում՝ ինչպես իր հարյուրավոր նախնիները։
«Այստեղ այնքան գեղեցիկ է, որ կարելի է հավերժ ապրել»,- ասել է նա։
