Միջազգային
Իրաքն ու Թուրքիան կստորագրեն ջրային ռեսուրսների կառավարման պատմական համաձայնագիր
Թուրքիայի արտաքին գործերի նախարար Հաքան Ֆիդանը Իրաքի փոխվարչապետ և արտաքին գործերի նախարար Ֆուադ Հուսեյնի հետ համատեղ մամուլի ասուլիսում ընդգծել է երկու երկրների միջև բոլոր ոլորտներում սերտ համագործակցությունը։
Ֆիդանը հայտարարել է, որ կողմերը կստորագրեն ջրային ռեսուրսների կառավարման վերաբերյալ համաձայնագիր, որը կհարթի ճանապարհը Իրաքի ջրային համակարգերի երկարաժամկետ արդիականացման համար։
«Սա կլինի երկրի պատմության մեջ ամենամեծ ենթակառուցվածքային նախաձեռնությունը։ Միասին մենք կլուծենք հիմնական մարտահրավերներից մեկը, որպեսզի ապագա սերունդները չբախվեն անցյալ սերունդների կրած դժվարություններին», - ընդգծել է Ֆիդանը։
Թուրքիայի արտաքին գործերի նախարարը նաև հայտարարել է, որ Անկարան և Բաղդադը կակտիվացնեն համագործակցությունը էներգետիկ ոլորտում։ Նա նշել է նավթատարի վերսկսումը և ընդգծել, որ բանակցություններ են ընթանում գազի և էլեկտրաէներգիայի ոլորտներում համատեղ նախագծերի շուրջ։
Ֆուադ Հուսեյնը ընդգծել է, որ Իրաքը Թուրքիայի հետ ունի ամուր աշխարհագրական և պատմական կապեր։ Նրա խոսքով՝ երկու երկրների հարաբերությունները հիմնված են փոխադարձ շահերի վրա և ներառում են առևտուր, տնտեսություն և էներգետիկա։
