Լուվրի թանգարանից Ֆրանսիայի թագավորական զարդերի գողության գործով կասկածյալներից երկուսը խոստովանել են կատարվածին իրենց մասնակցությունը․ հաղորդել է Փարիզի դատախազությունը։
Դատախազ Լոր Բեկկոյի խոսքով՝ գողացված թանկարժեք զարդերը դեռևս չեն գտնվել։
Կալանավորված տղամարդկանցից երկուսը հարցաքննության ընթացքում մասնակիորեն ընդունել են իրենց մասնակցությունը։
Նրանք ձերբակալվել են շաբաթ երեկոյան և ենթարկվել 96-ժամյա հարցաքննության։ Չորեքշաբթի օրը ոստիկանությունը Փարիզի շրջակայքում ձերբակալել է նաև երրորդ կասկածյալին։
Առաջին կասկածյալը Ալժիրի 34-ամյա քաղաքացի է։ Երկրորդը՝ Փարիզի արվարձաններից մեկի 39-ամյա բնակիչ, վարորդ։ Գողացված գոհարների ընդհանուր արժեքը գնահատվում է շուրջ 88 միլիոն եվրո (102 միլիոն ԱՄՆ դոլար)։
Դատախազի խոսքով՝ կազմակերպված խմբով գողությունը նախատեսում է մինչև 15 տարվա ազատազրկում և խոշոր տուգանք։
Հետաքննությանը ներգրավված է ավելի քան 100 քննիչ։
