Առնվազն 64 մարդ է զոհվել Ռիո-դե-Ժանեյրոյի հյուսիսային արվարձաններում «Կարմիր հրամանատարություն» բանդայի դեմ ոստիկանական գործողության ընթացքում։
Զոհվածների թվում չորս ոստիկաններ են, հայտնել է Ռիո-դե-Ժանեյրո նահանգի նահանգապետ Կլաուդիո Կաստրոն։ Ձերբակալվել է ավելի քան 80 մարդ։ Գործողությանը մասնակցում են ինչպես քաղաքացիական, այնպես էլ ռազմական ոստիկանությունը։
Մոտ 2500 ոստիկան առավոտյան մտել է ֆավելներ, և շուտով սկսվել են բախումներ։ «Կարմիր հրամանատարությունը» (Comando Vermelho) պատասխանել է կրակով, այրվող բարիկադներով և ռումբեր նետող անօդաչուներով։
Տեղեկություններ կան նաև տասնյակ վիրավորների մասին, որոնց թվում խաչաձև կրակի տակ հայտնված քաղաքացիական անձիք են։
Ռիո-դե-Ժանեյրոյի օդանավակայանի մոտ գտնվող ֆավելների տարածքը համարվում է Բրազիլիայի ամենահզոր հանցավոր խմբավորումներից մեկի գործունեության կենտրոն։
Նահանգի կառավարությունում ասում են, որ զոհվածներից մոտ 50-ը «ոստիկանության կողմից նշված են որպես կասկածյալ հանցագործներ»։
ՄԱԿ-ի մարդու իրավունքների գրասենյակը հայտարարել է, որ «սարսափած է» բրազիլական ոստիկանության գործողություններից և կոչ է արել անցկացնել «արագ և արդյունավետ հետաքննություն»։
Բրազիլիայում խոշոր ոստիկանական գործողությունները հաճախ անցկացվում են մեծ միջազգային միջոցառումների նախօրեին։ Նոյեմբերին երկրի հյուսիսում գտնվող Բելեն քաղաքում կանցկացվի ՄԱԿ-ի COP30 կլիմայական գագաթնաժողովը։
