Լիսաբոնի «Գլորիա» ֆունիկուլյորի՝ սեպտեմբերի սկզբին տեղի ունեցած վթարի պատճառները հետաքննող փորձագետները նախնական զեկույցում տեխնիկակնա սպասարկման հետ կապված խախտումներ են մատնանշել։
Զբոսաշրջիկների շրջանում հայտնի «Գլորիան» սեպտեմբերի 3-ի երեկոյան դուրս է եկել ռելսերից, ինչի հետևանքով զոհվել է 16 մարդ, այդ թվում՝ 11 զբոսաշրջիկ, և ևս 20-ը վիրավորվել են:
Ըստ նախնական տվյալների՝ վթարը տեղի է ունեցել ձգող պարանը կտրվելու պատճառով: Պորտուգալիայի ավիացիոն և երկաթուղային վթարների կանխարգելման ու հետաքննության կառավարումը (GPIAAF) հայտնել է, որ պարանը անսարք էր և չէր համապատասխանում ուղևորափոխադրումների համար պահանջվող սերտիֆիկացմանը: 35 էջանոց զեկույցում նշվում է, որ պարանը չի բավարարել Լիսաբոնի տրամվայների և ֆունիկուլյորների օպերատոր Carris ընկերության պահանջներին:
Պարանը ձեռք է բերվել 2022 թվականին, սակայն Carris-ի ինժեներները չեն վերահսկել դրա վիճակը և չեն անցկացրել անվտանգության ստուգումներ:
Այժմ ընկերությունը հայտարարել է ֆունիկուլյորների և տրամվայների տեխնիկական սպասարկման բաժնի ղեկավարի աշխատանքից ազատման մասին:
Բացի պարանի անսարքությունից, խնդիրներ են հայտնաբերվել նաև արտակարգ իրավիճակներում արգելակման համակարգում, որը վարորդը փորձել է օգտագործել պարանի կտրվելու ժամանակ, սակայն այն չի գործել և նախապես չի ստուգվել:
