Ֆրանսիայի նախագահ Էմանուել Մակրոնը վերանշանակել է Սեբաստիան Լեկորնուին վարչապետի պաշտոնում՝ ընդամենը չորս օր անց այն բանից, երբ վերջինս հրաժարական տվեց։ Այս քայլը առաջացրել է ընդդիմության զայրույթը. նրանք խոստացել են առաջին իսկ հնարավորության դեպքում տապալել նոր կաբինետը:
Կիրակի օրը Լեկորնուն ներկայացրել է նոր կառավարություն, որի կազմում ընդգրկվել են «քաղաքացիական հասարակության» ներկայացուցիչներ, «երիտասարդ խորհրդարանականներ» և նախկինում Բայրուի ու Բարնյեի կառավարություններում ընդգրկված նախարարներ: «Ազատության լիգա» և «Ազգային միավորում» կուսակցությունները խոստացել են դատապարտել կառավարությունը:
Կենտրոնամետ «Հանրապետականներ» կուսակցությունը, որը համարվում էր կարևոր քաղաքական դաշնակից, հայտարարել է, որ չի մասնակցի նոր կառավարության ձևավորմանը և կհամագործակցի միայն «օրինագիծ առ օրինագիծ» սկզբունքով՝ էլ ավելի բարդացնելով Լեկորնուի հնարավորությունները:
Իր հերթին, վարչապետը խոստացել է համագործակցել բոլոր հիմնական քաղաքական ուժերի հետ և ընտրել կաբինետի անդամներ, որոնք «չեն կաշկանդվի կուսակցական շահերով»:
Կիրակի երեկոյան Սեբաստիեն Լեկորնուն ներկայացրել է «առաքելության վրա կենտրոնացած կառավարություն», որը միավորում է «քաղաքացիական հասարակությունը», «փորձառու մասնագետներին» և «երիտասարդ խորհրդարանականներին»: Վարչապետը նպատակ ունի ժամանակին ներկայացնել 2026 թվականի բյուջեի նախագիծը և դիմակայել ընդդիմության կողմից խոստացված անվստահության քվեին:
Նոր կառավարությունը մինչև երեքշաբթի պետք է ներկայացնի 2026 թվականի բյուջեի նախագիծը: Սահմանադրությունը խորհրդարանին տրամադրում է 70 օր՝ այդ պլանը մինչև տարեվերջ քննարկելու համար:
Նոր կառավարությունը բաղկացած է 34 նախարարից, որոնցից 19-ը մշտական են: Կառավարության կազմում ընդգրկվել են նոր դեմքեր, որոնցից ոմանք ներկայացնում են քաղաքացիական հասարակությունը, ինչպես դա եղել է Էդուար Ֆիլիպի կառավարությունում՝ Էմանուել Մակրոնի առաջին հնգամյա ժամանակաշրջանի ընթացքում:
