Մեքսիկայի կենտրոնական և ափամերձ շրջաններում տեղի ունեցած ջրհեղեղների հետևանքով զոհերի թիվը հասել է 31-ի, հաղորդում է El Universal թերթը։
Մահացության ամենամեծ թիվը՝ 18, գրանցվել է Իդալգո նահանգում։ Եվս ինը մարդ մահացել է Պուեբլայում, երեքը՝ Վերակրուսում և մեկը՝ Կերետարոյում։ Աղետը նաև լայնածավալ ավերածություններ և էլեկտրաէներգիայի անջատումներ է առաջացրել, այդ թվում՝ ջրհեղեղներ Վերակրուսի Պոսա Ռիկա քաղաքում, որտեղ ջրի մակարդակը տեղ-տեղ գերազանցել է երեք մետրը։
Իշխանությունները հայտնել են հարյուրավոր վնասված տների և տասնյակ ավերված կամուրջների ու ճանապարհների մասին։ Մի քանի համայնքներ մնում են առանց կապի և էլեկտրաէներգիայի։
Ավելի վաղ Մեքսիկայի նախագահ Կլաուդիա Շեյնբաումը X սոցիալական ցանցում հայտարարել էր, որ տուժած տարածքներին օգնություն ցուցաբերելու համար ուղարկվել են Ազգային պաշտպանության նախարարության և Ռազմածովային ուժերի անձնակազմ։
«Մեքսիկայի պաշտպանության նախարարությունը գործարկել է DN-III-E քաղաքացիական պաշտպանության ծրագիրը՝ տեղակայելով 5400 զինծառայողի: Ռազմածովային ուժերի նախարարությունը 3300 զինծառայող է տեղակայել Պուեբլա, Վերակրուս և Սան Լուիս Պոտոսի նահանգներում», - նշել է պետության ղեկավարը։
Մեքսիկայի հիդրոօդերևութաբանական ծառայությունը զգուշացրել է, որ մի քանի տուժած շրջաններում սպասվում են կրկնվող ուժեղ անձրևներ, որոնք կարող են հանգեցնել հետագա ջրհեղեղների, սողանքների և ավերածությունների։
