Միջազգային
Նկատեցիք՝ Հայաստանի վարչապետն ու Ադրբեջանի նախագահը ջերմ շփվեցին. Լեբեդև
Դուշանբեում ընթացող ԱՊՀ գագաթնաժողովի ընթացքում Նիկոլ Փաշինյանն ու Իլհամ Ալիևը ջերմ զրույց են ունեցել՝ քննարկելով Հարավային Կովկասում խաղաղության և անվտանգության ամրապնդման ուղիները. հայտնել է ԱՊՀ գլխավոր քարտուղար Սերգեյ Լեբեդևը։
«Դուշանբեի տոնական և գեղեցիկ մթնոլորտը նպաստեց, որ բազմաթիվ հանդիպումներն ու քննարկումները դրական արդյունքներ տան: Դուք, հավանաբար, նկատեցիք, որ Հայաստանի վարչապետն ու Ադրբեջանի նախագահը շատ ջերմ շփվեցին: Նրանք չքննարկեցին վիճելի հարցեր, այլ խոսեցին այն մասին, թե ինչպես առաջ շարժվել խաղաղությունն ու անվտանգությունը ամրապնդելու ճանապարհով»,- ասել է Լեբեդևը:
Նա նաև նշել է, որ գագաթնաժողովի ընթացքում ԱՊՀ երկրների ղեկավարների միջև տեղի են ունեցել բազմաթիվ երկկողմ հանդիպումներ. «Իմ սեփական աչքերով տեսա, թե ինչպես են Տաջիկստանի և Ղրղզստանի ղեկավարները, որոնք այժմ կարելի է ասել՝ բարեկամ եղբայրական ժողովուրդներ են, քննարկում ընկերության և համագործակցության խորացման հարցեր: Նույնը վերաբերում է Տաջիկստանի և Ուզբեկստանի հարաբերություններին»,- հավելել է Լեբեդևը:
Գլխավոր քարտուղարը ընդգծել է, որ Դուշանբեի գագաթնաժողովը նպաստել է կոնկրետ առաջարկներով և ծրագրերով բովանդակալից երկխոսությանը՝ ուղղված ԱՊՀ երկրների միջև համագործակցության ամրապնդմանը:
