Պերուի խորհրդարանը քվեարկել է նախագահ Դինա Բոլուարտեին պաշտոնից հեռացնելու օգտին: Պաշտոնանկության պատճառը երկրում հանցագործությունների աճն է, ինչը մեծ դժգոհություն է առաջացրել ժողովրդի շրջանում:
Բոլուարտեի փոխարեն ժամանակավոր նախագահ է նշանակվել 38-ամյա իրավաբան Խոսե Խերին՝ խորհրդարանի ղեկավարը:
Պատգամավորները Բոլուարտեին խնդրել են ներկայանալ խորհրդարան՝ բացատրություններ տալու համար, սակայն նա չի ներկայացել: Դրանից հետո կեսգիշերն անց նրանք քվեարկել են, և 124 պատգամավոր կողմ է արտահայտվել նրա հեռացմանը: Դեմ ձայներ չեն եղել:
Այս իրադարձությունները տեղի են ունեցել մայրաքաղաքում համերգի ժամանակ տեղի ունեցած կրակոցներից հետո, որոնք ավելի են սրել ժողովրդի դժգոհությունը հանցագործությունների դեմ պայքարի բացակայությունից: Ի տարբերություն Բոլուարտեին հեռացնելու նախորդ ութ անհաջող փորձերի, այս անգամ խորհրդարանի բոլոր խմբակցություններն աջակցել են որոշմանը:
Բոլուարտեն, որ Պերուի առաջին կին նախագահն էր, իշխանությունը ստանձնել էր 2022 թվականի դեկտեմբերին՝ նախկին նախագահ Պեդրո Կաստիլյոյի պաշտոնանկությունից հետո: Քվեարկությունից հետո նա ելույթ է ունեցել հեռուստատեսությամբ՝ խոսելով իր կառավարության ձեռքբերումների մասին: «Ես մտածել եմ ոչ թե իմ, այլ պերուացիների մասին», – ասել է նա: Սակայն ելույթն ընդհատվել է, երբ սկսվել է Խերիի երդմնակալությունը:
Խերին, որպես ժամանակավոր նախագահ, կպաշտոնավարի մինչև 2026 թվականի հուլիսի 28-ը:
