Իսրայելի և ՀԱՄԱՍ-ի միջև համաձայնագիրը նախատեսում է իսրայելական ուժերի նախնական դուրսբերում Գազայի հատվածից և մոտ 2000 պաղեստինցի բանտարկյալների և կալանավորների ազատ արձակում։ Երկու տարվա գերությունից հետո պետք է ազատ արձակվեն ողջ մնացած քսան իսրայելցի պատանդները, ինչպես նաև փոխանցվեն 28 մահացած պատանդները։
Այն ստորագրվել է Իսրայելի, ՀԱՄԱՍ-ի և Կատարի, Եգիպտոսի և Թուրքիայի միջնորդների կողմից՝ հինգշաբթի օրը, բայց շարունակելու համար անհրաժեշտ էր Իսրայելի կաբինետի հաստատումը, որը հավանություն է տվել դրան։
Նախագահ Թրամփի դեսպաններ Սթիվ Ուիթքոֆֆը և Ջարեդ Քուշները միացել են կաբինետի նիստին՝ վարչապետ Բենիամին Նեթանյահուի հետ միասին։
Համաձայնագրի հաստատումից հետո Գազայում հրադադարը անմիջապես ուժի մեջ է մտել։
Համաձայնագրի հաստատումից հետո 24 ժամվա ընթացքում իսրայելական զինվորականները պետք է իրենց ուժերը դուրս բերեն Գազայի համաձայնեցված պարագիծ։ Դա, ամենայն հավանականությամբ, կավարտվի ուրբաթ օրը։ Համաձայնագրի շրջանակներում, Գազայի և Եգիպտոսի միջև գտնվող Ռաֆահ անցակետը կվերաբացվի երկու ուղղություններով։ Անցակետը առայժմ կշահագործվի եգիպտա-եվրոպական համատեղ ուժերի կողմից։
Դրանից հետո 72 ժամվա ընթացքում ՀԱՄԱՍ-ը պետք է ազատ արձակի մնացած բոլոր պատանդներին։ Դա պետք է ավարտվի մինչև երկուշաբթի։
Դրանից հետո Իսրայելը կազատի 250 պաղեստինցի բանտարկյալների, որոնք ցմահ ազատազրկման են դատապարտվել իսրայելցիների սպանության համար։ Նրանք կտեղափոխվեն կամ Գազա, կամ կուղևորվեն արաբական և մուսուլմանական երկրներ։
Իսրայելը նաև կազատի 1700 պաղեստինցիների, որոնք ձերբակալվել էին Իսրայելի պաշտպանության ուժերի կողմից Գազայում՝ ՀԱՄԱՍ-ի կողմից 2023 թվականի հոկտեմբերի 7-ին իրականացված հարձակումից հետո։
28 մահացած պատանդների մարմինների դիմաց Իսրայելը կվերադարձնի Գազայում մարտերում զոհված 360 պաղեստինցիների մարմինները։
ՀԱՄԱՍ-ը հայտարարել է, որ իրեն ավելի շատ ժամանակ կպահանջվի բոլոր մահացած պատանդների մարմինները գտնելու համար։ Իսրայելցի պաշտոնյաները պնդել են, որ դա կեղծ պնդում է։ Համաձայնագրի համաձայն՝ Իսրայելը, ԱՄՆ-ն, Եգիպտոսը, Կատարը և Թուրքիան կստեղծեն աշխատանքային խումբ՝ ՀԱՄԱՍ-ի կողմից չգտնվող դիակները գտնելու համար։
Իսրայելը հրաժարվել է ազատ արձակել մի քանի բարձրաստիճան պաղեստինցի բանտարկյալների, որոնց ՀԱՄԱՍ-ը համարում է խորհրդանիշ, ինչպես օրինակ՝ Արևմտյան ափի ՖԱԹԱՀ-ի նախկին առաջնորդ Մարվան Բարղութին։
Համասի գլխավոր բանակցող Խալիլ ալ-Հայյան հինգշաբթի օրը իր ելույթում հայտարարել է, որ Գազայում պատերազմն ավարտվել է, և սկսվել է մշտական հրադադար։
Նա ընդգծել է, որ Համասը երաշխիքներ է ստացել ԱՄՆ-ից և Կատարի, Թուրքիայի և Եգիպտոսի միջնորդներից, որ պատերազմն ամբողջությամբ ավարտվել է, և Իսրայելը միակողմանիորեն չի վերսկսի այն։
Ուիթքոֆֆը և Քուշները հինգշաբթի օրը Կահիրեում հանդիպել են Եգիպտոսի նախագահ Աբդել Ֆաթթահ ալ-Սիսիի հետ, որը Թրամփին հրավիրել է առաջիկա օրերին այցելել Կահիրե՝ ստորագրման արարողության համար։
Նախագահ Թրամփը հայտարարել է, որ կիրակի օրը կմեկնի Մերձավոր Արևելք և կայցելի Եգիպտոս և Իսրայել։ Նա Axios-ին ասել է, որ «հավանաբար» ելույթ կունենա Իսրայելի խորհրդարանում՝ Քնեսեթում։
