Եթե չեխական ընտրություններում հաղթած աջակողմյան պոպուլիստական «Դժգոհ քաղաքացիների գործողություն» (ANO) կուսակցությանը հաջողվի իշխող կոալիցիա կազմել, դա կապահովի, որ երկրի բյուջեն դադարեցնի Ուկրաինային ռազմական աջակցության համար միջոցներ հատկացնել, հայտարարել է կուսակցության առաջնորդ, միլիարդատեր Անդրեյ Բաբիշը:
Նա կոչ է արել Ուկրաինային ռազմական աջակցության բեռը ուղղակիորեն տեղափոխել ԵՄ-ի վրա: Բաբիշի խոսքով՝ Չեխիան արդեն «60 միլիարդ» է հատկացնում ԵՄ բյուջեին, որն աջակցում է Ուկրաինային։
Անդրեյ Բաբիշը նաև կրկին խոստացել է դադարեցնել ուկրաինական բանակի համար զինամթերք գնելու չեխական նախաձեռնությունը, որի շրջանակներում, ըստ լրատվամիջոցների հաղորդագրությունների, Ուկրաինան 2024 թվականին ստացել է 1.5 միլիոն հրետանային արկ, իսկ 2025 թվականին՝ 1.1 միլիոն։
