Կիրակի օրը Սիրիայում կայացել են Բաշար ալ-Ասադի ռեժիմի տապալումից հետո առաջին խորհրդարանական ընտրությունները։ Դրանք դիտարկվում են որպես կարևոր քայլ անցումային շրջանի օրենսդրական գործընթացների ձևավորման համար։
Նոր ձևավորվող Սիրիայի ժողովրդական ժողովը պետք է կազմված լինի 210 պատգամավորից. տեղեր են նախատեսված կանանց ու ազգային փոքրամասնությունների համար։ Ուղղակի ընտրություններ չեն անցկացվել․ պատգամավորների երկու երրորդը ընտրվելու է «ընտրական կոլեգիաների» կողմից, իսկ մնացածին նշանակելու է ժամանակավոր նախագահ Ահմադ ալ-Շարաան։ Այս մոդելը քննադատության է արժանացել՝ ժողովրդավարական մասնակցությունը սահմանափակելու համար։
Ընտրություններին չեն մասնակցել երեք նահանգներ։ Ռաքքայում և Հասեքեում, որոնք վերահսկվում են քրդական ուժերի կողմից, ինչպես նաև Սուվեյդայում, որտեղ վերջերս տեղի են ունեցել արյունալի բախումներ կառավարական բանակի և դրուզական ջոկատների միջև, ժամանակավոր իշխանությունները ընտրությունները հետաձգել են։
