Պահպանողական ակտիվիստ Չարլի Քըրքի սպանության մեղադրանքով հետախուզվող 22-ամյա ը սեպտեմբերի 12-ին ձերբակալվել է 33 ժամ տևած որոնումներից հետո։
Յուտա նահանգի դատախազ Ջեֆ Գրեյը մամուլի ասուլիսի ժամանակ հայտնել է, որ Թայլերին առաջինը ճանաչել է ոչ թե հայրը, ինչպես սկզբում ենթադրվում էր, այլ մայրը։
Դատախազի խոսքով՝ լրատվամիջոցների եթերում տեսնելով որդու լուսանկարները՝ մայրը զանգահարել է նրան։ Թայլերը հայտնել է, թե տանն է և վերջին օրերին հիվանդ է եղել։ Մայրը այս մասին պատմել է ամուսնուն, և նրանք երկուսն էլ եկել են այն եզրակացության, որ լուսանկարներում պատկերված փնտրվող անձը նման է իրենց որդուն։
Միևնույն ժամանակ, Թայլերի հայրը, լուսանկարներում նկատելով հրացանը, ենթադրել է, որ այն նման է այն հրացանին, որը տարիներ առաջ Թայլերին նվիրել էր պապը։ Նա որդուն հաղորդագրություն է ուղարկել՝ խնդրելով ուղարկել հրացանի լուսանկարը, սակայն պատասխան չի ստացել։ Դրանից հետո հայրը զանգահարել է նրան և համոզել վերադառնալ ծնողների տուն։ Տանը Թայլերը ակնարկել է, որ ինքն է կրակել Քըրքի վրա և ասել, որ նախընտրում էր մահանալ, քան բանտ ընկնել։
Դատախազ Գրեյի փոխանցմամբ՝ Թայլերի մայրը նաև հայտնել է, որ որդին վերջերս դարձել էր ավելի քաղաքականացված և սկսել էր հակվել ձախ հայացքների։ Դա տեղի է ունեցել այն բանից հետո, երբ նա սկսել էր հանդիպել իր սենյակակցի հետ։
Գրեյը լրագրողներին ներկայացրել է նաև Թայլերի և նրա զուգընկերոջ ենթադրյալ նամակագրությունը։ Այդ նամակագրության համաձայն՝ Թայլերը խնդրել է զուգընկերոջը ստուգել ստեղնաշարի տակ թողած գրառումը։ «Սենյակակիցը նայել է ստեղնաշարի տակ և գտել գրառում, որտեղ գրված էր. «Ես հնարավորություն ունեմ ազատվել Չարլի Քըրքից, և պատրաստվում եմ օգտվել դրանից»»,– ասել է դատախազը։
Հաղորդագրություններում Թայլերը նաև նկարագրել է, թե ինչպես է փորձում թաքնվել ոստիկանությունից և տեղեկացրել է իր տեղաշարժերի մասին։ Մի պահ նա, ըստ դատախազի, գրել է Քըրքի մասին. «Ինձ համար բավական է նրա ատելությունը։ Ոչ բոլոր ատելությունները կարելի է վերացնել բանակցություններով»։
Գրեյը նշել է, որ Թայլերն ու իր զուգընկերը քննարկել են նաև Քըրքի սպանությունից հետո քաղաքից հեռանալու նրա ծրագրերը, ինչպես նաև նրա հաշմանդամության փաստը և այն, թե ինչպես է նա ստիպված լինելու դա բացատրել հորը։ Ավելի ուշ Թայլերը հայտնել է, որ մտադիր է հանձնվել, և խնդրել է սենյակակցին չխոսել լրատվամիջոցների հետ ու գտնել փաստաբան։
Թայլերը առաջին անգամ դատարանի առջև կանգնել է տեսակապով՝ նախնական նիստի ընթացքում։ Նա լսել է դատավորի կողմից ներկայացված մեղադրանքները, ինչպես նաև դատախազի հայտարարությունը, ըստ որի՝ մեղադրող կողմը պատրաստվում է մահապատիժ պահանջել։
Հաջորդ դատական նիստը նշանակված է սեպտեմբերի 29-ին։
