Օտարերկրյա լրատվամիջոցների հաղորդմամբ՝ մի քանի շաբաթ տևած ռմբակոծություններից ու օդային հարվածներից հետո այս գիշեր Իսրայելի բանակը սկսել է հարձակումը Գազա քաղաքի վրա։
Ըստ Axios-ի՝ հղում անելով Իսրայելի անանուն պաշտոնյաներին, հաղորդվել է հարձակման մեկնարկի մասին։ The Jerusalem Post-ը գրում է, որ կարող է «հաստատել» հարձակման վերաբերյալ տեղեկությունները։
Al Jazeera-ն և The Times of Israel-ը հայտնում են, որ վերջին ժամերին Իսրայելի բանակը ուժեղացրել է հարվածները Գազայի ուղղությամբ։ Agence France-Presse (AFP)-ը, հղում անելով տեղի բնակիչներին, հայտնում է քաղաքի վրա շարունակական և հզոր ռմբակոծությունների մասին։
Ըստ հաղորդումների՝ Իսրայելի կառավարությունը դեռ օգոստոսի սկզբին է կայացրել Գազայի քաղաքը գրավելու որոշումը։ Իսրայելի վարչապետ Բենյամին Նեթանյահուն և նրա կառավարության անդամները հայտարարել են, որ Գազայում տեղակայված են ՀԱՄԱՍ խմբավորման հիմնական հենակետերը, և իրենք մտադիր են ամբողջությամբ ոչնչացնել այդ խմբավորումը։
Հայտարարելով Գազայի հյուսիսում գտնվող համանուն քաղաքը գրավելու մտադրության մասին՝ Իսրայելը կոչ էր արել տեղի բնակիչներին տարհանվել։ Սակայն, ինչպես նշում են բազմաթիվ պարբերականներ, մոտ մեկ միլիոն բնակչություն ունեցող Գազա քաղաքից մինչ այժմ տարհանվել է շուրջ 300 հազար պաղեստինցի։
