Իսրայելի վարչապետ Բենիամին Նեթանյահուն Երուսաղեմում, ԱՄՆ պետքարտուղար Մարկո Ռուբիոյի հետ հանդիպման ժամանակ, հայտարարել է, որ Ամերիկան չունի ավելի լավ դաշնակից, քան Իսրայելը, իսկ Իսրայելը չունի ավելի լավ դաշնակից, քան Ամերիկան:
Պետքարտուղար Ռուբիոն էլ խոստացել է, որ Վաշինգտոնը անփոփոխ աջակցություն կցուցաբերի Իսրայելին՝ Գազայում իր նպատակներին հասնելու համար։ Նա կոչ է արել ոչնչացնել ՀԱՄԱՍ-ը:
«Գազայի բնակիչներն արժանի են լավ ապագայի, բայց այն չի կարող գալ, քանի դեռ ՀԱՄԱՍ -ը չի վերացվել։ Դուք կարող եք ապավինել մեր շարունակական աջակցությանը և հաջողության հասնելու մղմանը», - ասել է Ռուբիոն:
Ռուբիոյի այցն Իսրայել տեղի է ունենում Մերձավոր Արևելքում ԱՄՆ-ի այլ դաշնակիցների հետ հարաբերությունների լարվածության ֆոնին՝ Կատարում ՀԱՄԱՍ-ի առաջնորդներին Իսրայելի հարվածի և գրավյալ Արևմտյան ափին բնակավայրերի ընդլայնման պատճառով:
«Ռուբիոյի այցը հստակ ազդանշան է այն մասին, որ Ամերիկան աջակցում է Իսրայելին ահաբեկչության դեմ պայքարում», - հավելել է Նեթանյահուն:
