ՄԱԿ-ի Անվտանգության խորհուրդն այսօր Լեհաստանի խնդրանքով արտակարգ նիստ կգումարի. Վարշավան ձգտում է միջազգային աջակցություն ստանալ չորեքշաբթի օրը ռուսական անօդաչու թռչող սարքերի կողմից երկրի օդային տարածք ներխուժման հետևանքով:
Բազմաթիվ եվրոպական դաշնակիցներ խոստացել են աջակցել Լեհաստանին, ներառյալ Գերմանիայի խոստումը՝ ուժեղացնելու իր ռազմական ներկայությունը ՆԱՏՕ-ի արևելյան թևում, սակայն որոշ երկրներ վիճարկել են, թե արդյոք ներխուժումը Ռուսաստանի կողմից Լեհաստանի դեմ միտումնավոր հարձակում էր: ԱՄՆ նախագահ Դոնալդ Թրամփը հանրային աջակցություն գրեթե չի ցուցաբերել:
Հինգշաբթի օրը Թրամփը լրագրողներին հայտնել է, որ ներխուժումը կարող էր «սխալմունք» լինել՝ ավելացնելով. «Ես ընդհանրապես գոհ չեմ այդ ամբողջ իրավիճակից, բայց հուսով եմ, որ այն կավարտվի»:
Ի պատասխան՝ Լեհաստանի արտգործնախարար Ռադոսլավ Սիկորսկին X սոցիալական հարթակում գրել է. «Ոչ, դա սխալ չէր»:
Ավելի վաղ Սիկորսկին տեղական ռադիոյին հայտնել էր, որ Լեհաստանը ծրագրում է օգտագործել Անվտանգության խորհրդի նիստը՝ «աշխարհի ուշադրությունը հրավիրելու Ռուսաստանի կողմից ՄԱԿ-ի, Եվրամիության և ՆԱՏՕ-ի անդամ երկրի օդային տարածքի աննախադեպ խախտման վրա»:
Նա ընդգծել է, որ Լեհաստանի իշխանությունները կասկած չունեն, որ այդ գործողությունը միտումնավոր էր: «Մեր օդային տարածքի 19 խախտում, տասնյակ անօդաչու սարքեր, որոնցից մի քանիսը խոցվել են, գործողություն, որը տևել է յոթ ժամ՝ ամբողջ գիշեր. սա չի կարող պատահականություն համարվել», - ասել է նա:
